Israel: సెర్బియాలోని ఇజ్రాయెల్‌ ఎంబసీ వద్ద దాడి

భద్రతాధికారికి గాయాలు
నిందితుడిని కాల్చి చంపిన అదే అధికారి

బెల్‌గ్రేడ్‌: సెర్బియా రాజధాని బెల్‌గ్రేడ్‌లో ఉన్న ఇజ్రాయెల్‌ ఎంబసీవద్ద విల్లులాంటి ఆయుధంతో వచ్చిన దుండగుడు భద్రతాధికారిపై దాడి చేసి గాయపరిచాడు. వెంటనే తేరుకున్న అధికారి కాల్పులు జరిపి నిందితుడిని హతమార్చారు. శనివారం ఈ ఘటన జరిగిందని సెర్బియా హోంశాఖ వెల్లడించింది. ఎంబసీ వద్దకు వచ్చిన దుండగుడు భద్రతాధికారి మెడలోకి దూసుకెళ్లేలా మేకులాంటి పరికరాన్ని ప్రయోగించాడు. మెడలో మేకు దిగినా వెంటనే తేరుకున్న అధికారి తన ఆయుధంతో కాల్పులు జరిపారు. దీంతో నిందితుడు అక్కడికక్కడే మృతి చెందాడు. అధికారిని ఆసుపత్రికి తరలించి మెడలోకి దిగిన మేకును తొలగించారు. ఇది ఉగ్రదాడేనని ఇజ్రాయెల్‌ విదేశీ వ్యవహారాలశాఖ అధికార ప్రతినిధి వెల్లడించారు. అమెరికా ఎంబసీకి సమీపంలోనే ఇజ్రాయెల్‌ ఎంబసీ ఉంది.

ఎర్ర సముద్రంలో క్షిపణుల దాడి

ఎర్ర సముద్రంలో నౌక లక్ష్యంగా శుక్రవారం హూతీ రెబల్స్‌ 5 క్షిపణులను ప్రయోగించారు. హోడైడా సమీపంలో ఈ దాడి జరిగింది.