USA: ముఖంపై కొట్టి.. అమెరికాలో భారత సంతతి వ్యక్తి హత్య

ఓక్లహామా: అగ్రరాజ్యం అమెరికా (USA)లో ఇటీవల భారతీయులు, భారత సంతతి వ్యక్తులు వరుసగా దాడులకు గురవడం, ప్రాణాలు కోల్పోవడం వంటి ఘటనలు ఆందోళనకు గురిచేస్తున్నాయి. తాజాగా మరో భారత సంతతి వ్యక్తి (Indian American Man)పై దాడి జరిగింది. ఓ దుండగుడు ముఖంపై బలంగా కొట్టడంతో ఆయన మృతి చెందారు.

ఓక్లహామాలో జూన్‌ 22న జరిగిన ఘటన ఆలస్యంగా వెలుగులోకి వచ్చింది. మృతుడిని హేమంత్‌ మిస్త్రీగా గుర్తించారు. గుజరాత్‌కు చెందిన 59 ఏళ్ల మిస్త్రీ కొన్నేళ్లక్రితం అమెరికా వెళ్లి అక్కడే స్థిరపడ్డారు. ఓక్లహామాలో ఓ మోటెల్‌ మేనేజర్‌గా పనిచేస్తున్నారు.

అమెరికాలో కాల్పులు.. ఐదుగురి మృతి.. దుండగుడి ఆత్మహత్య!

గత శనివారం ఈ మోటెల్‌కు రిచర్డ్‌ లూయిస్‌ అనే వ్యక్తి వచ్చాడు. ఏదో విషయం కారణంగా వీరి మధ్య గొడవ జరగడంతో ఇక్కడినుంచి వెళ్లిపోవాలని మిస్త్రీ గట్టిగా చెప్పాడు. దీంతో ఆవేశానికి గురైన రిచర్డ్‌ ఆయన ముఖంపై బలంగా కొట్టాడు. ఈ దాడితో అక్కడికక్కడే కుప్పకూలిన మిస్త్రీని వెంటనే ఆసుపత్రికి తరలించారు. చికిత్స పొందుతూ మరుసటిరోజు ఆయన ప్రాణాలు కోల్పోయారు.  ఈ ఘటనపై కేసు నమోదు చేసుకున్న పోలీసులు నిందితుడిని అరెస్టు చేశారు. వారి మధ్య గొడవకు గల కారణాలు ఇంకా తెలియరాలేదు. ప్రస్తుతం దీనిపై దర్యాప్తు కొనసాగుతోంది.

ఇటీవల డాలస్‌లో ఆంధ్రప్రదేశ్‌కు చెందిన దాసరి గోపీకృష్ణ (32)పై ఓ దుండగుడు కాల్పులు జరిపిన సంగతి తెలిసిందే. ఈ ఘటనలో అతడు అక్కడికక్కడే ప్రాణాలు కోల్పోయాడు. నిందితుడు స్టోర్‌లో దొంగతనానికి వచ్చాడని.. గోపీకృష్ణ విధుల్లో ఉండటంతో కాల్పులకు తెగబడ్డాడని పోలీసులు తెలిపారు.