బ్రిటన్‌ పార్లమెంటు బరిలో భారత సంతతి అభ్యర్థుల హవా

ప్రధాన పార్టీల నుంచి పెద్ద సంఖ్యలో టికెట్లు

లండన్‌: బ్రిటన్‌ పార్లమెంటు ఎన్నికలకు సిద్ధమైంది. గురువారం ఓటర్లు తమ ఓటు హక్కు వినియోగించుకోనున్నారు. 2019 ఎన్నికల్లో భారత సంతతి అభ్యర్థులు రికార్డు స్థాయిలో ఎన్నికై పార్లమెంటులో అడుగడుపెట్టి చరిత్ర సృష్టించారు. ఈ దఫా ఎన్నికల్లోనూ అటు కన్జర్వేటివ్‌ పార్టీ, ఇటు లేబర్‌ పార్టీ తరఫున పెద్ద సంఖ్యలో భారత మూలాలున్న అభ్యర్థులు బరిలోకి దిగారు. 2019లో 15 మంది భారత సంతతివారు పార్లమెంటు దిగువ సభ అయిన హౌస్‌ ఆఫ్‌ కామన్స్‌కు ఎన్నికయ్యారు. ఈదఫా కన్జర్వేటివ్‌ పార్టీ తరఫున ప్రధాని రిషి సునాక్‌తో పాటు శైలేష్‌ వారా, ప్రీతి పటేల్, గగన్‌ మొహీంద్ర, క్లెయిర్‌ కౌటిన్హో మరోసారి అభ్యర్థులుగా రంగంలోకి దిగారు. వీరితోపాటు కొత్తగా శివానీ రాజా, అమీత్‌ జోగియా తదితరులకు ఈ పార్టీ టికెట్లు ఇచ్చింది. ఇదే పార్టీ నుంచి తెలుగు సంతతికి చెందిన చంద్ర కన్నెగంటి బరిలో ఉన్నారు. మరోవైపు లేబర్‌ పార్టీ తరఫున నవేందు మిశ్రా, ప్రీత్‌ కౌర్‌ గిల్, తన్మన్‌జీత్‌ సింగ్‌ దేశి, లీసా నంది, సీమా మల్హోత్రా తదితరులు పోటీ చేస్తున్నారు. ఇతర పార్టీలు కూడా భారత సంతతి వ్యక్తులకు టికెట్లు ఇచ్చాయి.