బెంబేలెత్తించిన బెరిల్‌.. ద్వీపం ధ్వంసం!

క్లిఫ్టన్‌: కరీబియన్‌ దీవుల్లో భీకర ‘బెరిల్‌’ హరికేన్‌ భారీ విధ్వంసం సృష్టించింది. గంటకు దాదాపు 150 కిలోమీటర్ల వేగంతో వీచిన గాలులు అనేక దీవుల్లో తీవ్ర ఆస్తి, ప్రాణ నష్టానికి దారితీశాయి. 20 ఏళ్ల క్రితం వచ్చిన ‘ఐవాన్‌’ తర్వాత.. అంతటి భారీ హరికేన్‌ ఇదేనని స్థానిక అధికారిక యంత్రాంగం వెల్లడించింది. సెయింట్‌ విన్సెంట్, గ్రెనడైన్స్‌లోని ‘యూనియన్‌ ఐలాండ్‌’లో 90 శాతం ఇళ్లు పూర్తిగా ధ్వంసమయ్యాయి. ఉన్న ఒక్క విమానాశ్రయం పైకప్పు మొత్తం ఎగిరిపోయింది. ఇప్పటివరకు ఈ దీవిలో ఆరుగురు ప్రాణాలు కోల్పోయారు. పక్కనే ఉన్న బెఖియా దీవిలోనూ తీవ్ర ఆస్తి నష్టం సంభవించింది. తాగునీరు, విద్యుత్‌ సరఫరా పూర్తిగా నిలిచిపోయింది.