స్పెయిన్‌ విమానంలో కుదుపులు.. ఆగమాగమైన ప్రయాణికులు

ఇంటర్నెట్‌ డెస్క్‌: గగనతలంలో వెళుతున్న విమానంలో ఒక్కసారిగా కుదుపులు రావడంతో ప్రయాణికులంతా భయభ్రాంతులకు గురయ్యారు. ఆ కుదుపుల తీవ్రతకు కొందరు సీట్లలో నుంచి అమాంతం ఎగిరిపడ్డారు. ఒక వ్యక్తి ఏకంగా ఓవర్‌హెడ్‌ బిన్‌ వద్ద ఇరుక్కుపోయాడు. మిగతా ప్రయాణికులు అతణ్ని కిందికి దించుతున్న దృశ్యాలు వైరల్‌గా మారాయి. సోమవారం జరిగిన ఈ ఘటనలో 30 మందికి పైగా గాయపడ్డారు. అంతర్జాతీయ మీడియా కథనాల ప్రకారం.. ‘ఎయిర్‌ యురోపా’ విమానయాన సంస్థకు చెందిన బోయింగ్‌ 787-9 విమానం 325 మంది ప్రయాణికులతో స్పెయిన్‌ నుంచి ఉరుగ్వేకు బయల్దేరింది. మధ్యలో ఒక్కసారిగా కుదుపులకు గురై ప్రయాణికులు ఎగిరిపడటమే కాకుండా సీలింగ్‌ ప్యానెల్, సీట్లు దెబ్బతిన్నాయి. చిన్నారులు భయంతో ఏడుపు లంకించుకున్నారు. అనూహ్యమైన ఈ ఘటనతో విమానాన్ని అత్యవసరంగా బ్రెజిల్‌లోని నాటల్‌ ఎయిర్‌పోర్టులో దింపారు. గాయపడిన వారికి చికిత్స అందిస్తున్నారు. ఐరోపా టూర్‌ ముగించుకొని స్వదేశానికి తిరిగి వెళుతున్న ఓ ప్రయాణికుడు ఈ ఘటనపై మాట్లాడుతూ.. ‘‘మార్గమధ్యంలో ఉండగా కుదుపుల గురించి కెప్టెన్‌ హెచ్చరించారు. సీట్‌బెల్టు సరిగా పెట్టుకోనివారు గాల్లోకి ఎగిరిపడ్డారు. అది భయానక అనుభవం’’ అన్నారు. ప్రయాణికులను తరలించేందుకు ప్రత్యామ్నాయ ఏర్పాట్లుచేసినట్లు విమానయాన సంస్థ వెల్లడించింది.