ఫ్రాన్స్‌లో పార్లమెంటరీ ఎన్నికల తొలి విడత పూర్తి

పారిస్‌: ఫ్రాన్స్‌లో ఉత్కంఠ రేకెత్తిస్తున్న పార్లమెంటరీ ఎన్నికల పర్వం ప్రారంభమైంది. మొత్తం రెండు విడతల్లో ఈ ఎన్నికలు జరగనుండగా.. ఆదివారం తొలి రౌండ్‌ పోలింగ్‌ పూర్తయింది. ఈ నెల ఏడున మలి విడత పోలింగ్‌ జరగనుంది. దేశాధ్యక్షుడు ఇమ్మాన్యుయేల్‌ మెక్రాన్‌ నేతృత్వంలోని సెంట్రిస్ట్‌ కూటమి, అతి మితవాద నేషనల్‌ ర్యాలీ, న్యూ పాపులర్‌ ఫ్రంట్‌ల మధ్య త్రిముఖ పోరు హోరాహోరీగా కనిపిస్తోంది. 2022 నాటి ఎన్నికలతో పోలిస్తే ఈ దఫా ఓటింగ్‌ శాతం ఎక్కువగా ఉన్నట్లు తెలుస్తోంది. ఫ్రాన్స్‌లో మొత్తం ఓటర్ల సంఖ్య 4.95 కోట్లు. వారు పార్లమెంటుకు 577 మంది సభ్యులను ఎన్నుకోనున్నారు. ఐరోపా పార్లమెంటు ఎన్నికల్లో అతి మితవాదులు ఘన విజయం సాధించడంతో మెక్రాన్‌ పార్లమెంటుకు ముందస్తు ఎన్నికలు నిర్వహిస్తున్న సంగతి తెలిసిందే.