నైజీరియాలో వరుస ఆత్మాహుతి దాడులు

18 మంది మృతి 

మైదుగురి: నైజీరియాలో శనివారం జరిగిన వరుస ఆత్మాహుతి దాడులు కలకలం రేపాయి. ఈ దాడుల్లో కనీసం 18 మంది మృతిచెందారు. 30 మంది తీవ్రంగా గాయపడగా.. వీరిలో 19 మంది పరిస్థితి విషమంగా ఉంది. నైజీరియా ఈశాన్య ప్రాంతంలోని బోర్నో రాష్ట్రం గ్వోజా పట్టణంలో జరిగిన ఈ ఘటనల్లో అనుమానాస్పద మహిళా ఆత్మాహుతి బాంబర్లు దాడులకు పాల్పడినట్లు అధికారులు తెలిపారు. మొదట.. గ్వోజా పట్టణంలో శనివారం సాయంత్రం జరిగిన ఓ వివాహ కార్యక్రమంలో చిన్నారిని ఎత్తుకున్న ఓ మహిళ తనను తాను పేల్చుకున్నట్లు స్థానిక పోలీసులను ఉటంకిస్తూ ఏఎఫ్‌పీ న్యూస్‌ కథనాన్ని ప్రచురించింది. తర్వాత అదే పట్టణంలోని జనరల్‌ ఆసుపత్రిలో మరో మహిళ ఆత్మాహుతి దాడికి పాల్పడింది. ఈ రెండు దాడుల నుంచి తేరుకోక ముందే.. వివాహ కార్యక్రమంలో మరణించినవారి అంత్యక్రియల ఏర్పాట్లలో మూడో మహిళ తన శరీరానికి అమర్చుకున్న ఐఈడీని పేల్చుకుంది.