కృత్రిమ మేధ సమాధానాలను గుర్తించడం కష్టమే

దిల్లీ: తరగతి గదిలో రోజూ పాఠాలు నేర్చుకుని పరీక్షలకు హాజరైన విద్యార్థుల కంటే కృత్రిమ మేధ ఆధారిత చాట్‌బోట్‌లు అద్భుతంగా పరీక్షలు రాసేస్తున్నాయి! సమాధానాలను ఏఐతో రాసినట్లు గుర్తించడమే ఎగ్జామినర్లకు కష్టమవుతోంది. బ్రిటన్‌లోని యూనివర్సిటీ ఆఫ్‌ రీడింగ్‌కి చెందిన కొందరు పరిశోధకులు 33 మంది కల్పిత విద్యార్థుల పేరిట చాట్‌జీపీటీ సమాధానాలను  సిద్ధం చేశారు. వాటిని అదే విశ్వవిద్యాలయంలోని ‘స్కూల్‌ ఆఫ్‌ సైకాలజీ అండ్‌ క్లినికల్‌ లాంగ్వేజ్‌ సైన్సెస్‌’ విభాగానికి చెందిన పరీక్షల నిర్వహణ వ్యవస్థకు పంపించారు. వాటిలో 94 శాతం సమాధానాల్లో.. రాసింది ఎవరనే తేడాను ఆ బృందం గుర్తించనే లేదు. అసలు విద్యార్థుల కంటే దాదాపు 83 శాతం చాట్‌బోట్లకే ఎక్కువ మార్కులు రావడం గమనార్హం. విద్యలో మదింపు వ్యవస్థనే ఏఐ ప్రభావితం చేస్తుందని, ఈ పరిణామం మన విద్యావేత్తలకు మేలుకొలుపు లాంటిదని పరిశోధకులు పేర్కొన్నారు.