LGBTQ couples: అమెరికా సాక్షిగా.. హాంకాంగ్‌లో ఒక్కటైన 10 స్వలింగ జంటలు

- వీడియో చాట్‌తో వివాహాల నమోదు

హాంకాంగ్‌: పది స్వలింగ జంటలు హాంకాంగ్‌లోని ఒక హోటల్‌ హాలులో సమావేశమై ఇంటర్నెట్‌ ద్వారా అమెరికాలోని అధికారి ఆధ్వర్యంలో వివాహబంధంలోకి అడుగుపెట్టాయి. ఇటువంటి జంటలను అధికారికంగా గుర్తించని హాంకాంగ్‌ వారికి చట్టపరమైన రక్షణను మాత్రం కల్పిస్తుంది. హాంకాంగ్‌లోని కౌలూన్‌ పట్టణంలో మంగళవారం జరిగిన ఈ వివాహాలను దాదాపు 11 వేల కి.మీ.ల దూరాన ఉన్న అమెరికాలోని యూటా రాష్ట్ర అధికారి రిజిస్టరు చేశారు. సాధారణంగా అమెరికాలోని చాలా రాష్ట్రాల్లో ఇటువంటి వివాహాలకు ఆయా జంటలు భౌతికంగా హాజరై అధికారిక లాంఛనాలను పూర్తిచేయాల్సి ఉంటుంది. కొవిడ్‌-19 అనంతరం యూటా రాష్ట్రంలో మాత్రం డిజిటల్‌ దరఖాస్తుల ద్వారా ఆన్‌లైన్‌ పెళ్లిళ్లకు అనుమతిస్తున్నారు. ఆయా కుటుంబాల సభ్యులు హాజరైన ఈ వేడుకలో పది జంటలు సంబరంగా ఉంగరాలు మార్చుకున్నాయి. స్వలింగ జంటల పెళ్లిళ్లకు హాంకాంగ్‌లో రిజిస్ట్రేషను విధానం లేనందున, ఈ విధంగా వారి కలలను తాము నిజం చేస్తున్నట్లు ఈ వివాహాల నిర్వాహకుడైన కర్ట్‌ టంగ్‌ తెలిపారు.