Pakistan: పెషావర్‌లో మారణహోమం.. 56కి చేరిన మృతులు!

ఇస్లామాబాద్: పాకిస్థాన్‌లోని పెషావర్ బాంబు పేలుడుతో దద్దరిల్లింది.  కొచా రిసాల్డర్‌ ప్రాంతంలోని ఓ మసీదులో జరిగిన పేలుళ్లలో మృతుల సంఖ్య 56కి చేరింది. ఈ ఘటనలో దాదాపు 194 మందికి పైగా గాయపడినట్టు లేడీ రీడింగ్‌ ఆస్పత్రి (ఎల్అ‌ర్‌హెచ్‌) అధికార ప్రతినిధి మహమ్మద్‌ అసీం వెల్లడించారు. క్షతగాత్రుల్లో పలువురి పరిస్థితి విషమంగా ఉందని తెలిపారు. ఇది ఆత్మాహుతిదాడిగా తెలుస్తోంది. మసీదులోకి వెళ్లే ముందు బయట ప్రధాన ద్వారం వద్ద పహారా కాస్తున్న వారిపై ఓ వ్యక్తి తుపాకీతో కాల్పులకు తెగబడగా.. ఓ పోలీసు కానిస్టేబుల్‌ మృతిచెందినట్టు పోలీస్‌ ఉన్నతాధికారులు తెలిపారు. మరో పోలీసు అధికారి పరిస్థితి విషమంగా ఉందని చెప్పారు. ఈ పేలుడుకు దాదాపు ఐదారు కిలోల పేలుడు పదార్థాలు వినియోగించినట్టు తెలిపారు. శుక్రవారం ప్రార్థనల నిమిత్తం ప్రజలు గుమిగూడిన సమయంలో ఈ పేలుడు సంభవించడంతో భారీ ప్రాణ నష్టం సంభవించింది. ఈ పేలుడు ఘటనతో మసీదులో శరీరభాగాలు చెల్లాచెదురుగా పడిఉండటంతో పాటు ఆ ప్రాంతమంతా రక్తసిక్తంగా మారింది.