దీపంలా మెరిసేలా..!

రంగురంగుల రంగవల్లికల్లో అందంగా తీర్చిదిద్దే దీపాలు.. బాణసంచా మోతలు.. చీకటిని పారదోలి వెలుగులు నింపే దీపావళి పండగ వచ్చేసింది. మరి, ఈ పండగ శోభను మరింత రెట్టింపు చేయాలంటే.. ఇంటి ముంగిళ్లనే కాదు.. మనమూ అందంగా ముస్తాబు కావాలి. సంప్రదాయబద్ధమైన కట్టూబొట్టూతో, ముద్దబంతిలాంటి నగుమోముతో మెరిసిపోవాలంటే అందుకు ముందు నుంచే సన్నద్ధం కావాలి. అప్పుడే దీపాల కాంతుల మధ్య అందమైన దీపంలా వెలిగిపోవచ్చు.

ముఖం శుభ్రంగా..

అందంగా, ప్రకాశవంతంగా కనిపించాలంటే చర్మం మీద ఎప్పటికప్పుడు పేరుకుపోయే మృతకణాలను తొలగించుకుంటూ ఉండాలి. ఈ క్రమంలో ఫేషియల్ చేయించుకోవాలి. త్రెడింగ్ ద్వారా కనుబొమ్మల్ని కూడా షేప్ చేసుకోవాలి. అయితే ముందుగా ఎంత సన్నద్ధమైనా దీపావళి రోజు మరింత ప్రకాశవంతంగా కనిపించాలి కాబట్టి ఇంట్లోనే లభించే వస్తువులతో కొన్ని ప్యాక్స్ వేసుకోవచ్చు.

ఈ క్రమంలో- తేనె, నిమ్మరసం సమపాళ్లలో తీసుకుని బాగా కలపాలి. ముఖం శుభ్రంగా కడుకున్న తర్వాత ఈ మిశ్రమాన్ని రాసుకోవాలి. దాదాపు 15 నుంచి 20 నిమిషాల పాటు ఆరనిచ్చి చల్లని నీళ్లతో శుభ్రం చేసుకుంటే సరి. నిమిషాల్లో మెరిసిపోయే చర్మం సొంతమవుతుంది.

అలాగే టొమాటోని ఉపయోగించి కూడా కాంతివంతంగా మారిపోవచ్చు. టొమాటోని ముక్కలుగా కోసి దాని గుజ్జుతో ముఖమంతా రుద్దుకోవాలి. అలా 15 నిమిషాల పాటు ఆరనిచ్చి తర్వాత ముఖం శుభ్రం చేసుకున్నా మంచి ఫలితం ఉంటుంది. ఇవేవీ కాకుండా ఐస్‌క్యూబ్‌తో ముఖం రుద్దుకున్నా సరే.. చర్మం ప్రకాశిస్తుంది.

మేకప్ ఇలా..!

ముందుగా మీ డ్రస్సింగ్ ఏ విధంగా ఉండాలనుకుంటున్నారో నిర్ణయించుకోవాలి. దాని ప్రకారమే మేకప్ వేసుకోవడం ప్రారంభించాలి. ఇందుకోసం ముఖం శుభ్రం చేసుకున్న వెంటనే పెదాలకు లిప్‌బామ్ రాసుకోవాలి. ఇలా చేయడం వల్ల పెదవులు పొడిబారకుండా తాజాగా ఉంటాయి. ఇప్పుడు మాయిశ్చరైజర్‌ని చర్మంలోకి ఇంకిపోయేలా నెమ్మదిగా రుద్దాలి. తర్వాత ప్రైమర్ రాసి, చర్మం రంగుకు సరిపడే ఫౌండేషన్‌ను అప్త్లె చేసుకోవాలి. కళ్ల కింద నల్లటి వలయాలు ఉంటే వాటిని కన్సీలర్‌తో కవర్ చేసుకోవాలి. ఇప్పుడు ముఖమంతా పౌడర్‌తో లైట్‌గా టచప్ ఇచ్చుకోవాలి. లిప్‌స్టిక్ అలవాటు ఉన్నవారు పెదాలకు నప్పే రంగు లిప్‌స్టిక్ వేసుకోవచ్చు.

నప్పే హెయిర్‌స్త్టెల్..

ప్రత్యేక సందర్భాలకు మనం ఎక్కువగా లూజ్ హెయిర్‌తోనే కనిపించాలని అనుకుంటాం. అయితే దీపావళికి మాత్రం జుట్టును అలా వదలకపోవడమే మంచిది. దీపాల మధ్య తిరుగుతూ, హడావిడిగా ఉంటాం కాబట్టి చాలా జాగ్రత్తగా ఉండాలి. అందుకే జడ వేసుకోవడం లేదా సింపుల్ హెయిర్ నాట్స్ ప్రయత్నించడం చక్కటి ప్రత్యామ్నాయం. మీరు ఎంచుకున్న డ్రస్సింగ్ ప్రకారం మీకు ఏ హెయిర్‌స్త్టెల్ నప్పుతుందో నిర్ణయించుకోవాలి. కావాలనుకుంటే హెయిర్ యాక్సెసరీస్ ఉపయోగించి మరింత ఆకర్షణీయంగా రడీ కావచ్చు.

జాగ్రత్తగా డ్రస్సింగ్..

దీపావళి రోజున కొందరు సంప్రదాయబద్ధంగా కనిపించడానికి ఇష్టపడితే, మరికొందరు ట్రెండీగా కనిపించాలని అనుకుంటారు. అయితే ఎలా కనిపించాలనుకున్నా సరే- ఎంపిక చేసుకునే వస్త్రాలు మాత్రం సాధ్యమైనంత మేరకు కాటన్‌వే వేసుకోవడం మంచిది. సిల్క్, పట్టు వస్త్రాలు ధరించి దీపాల మధ్య తిరగడం ప్రమాదకరం. కాబట్టి డ్రస్సింగ్ ఏదైనా మొదటి ప్రాధాన్యం సౌకర్యవంతంగా ఉండటానికే ఇవ్వాలి.