నా వల్లే పెళ్లి చేసుకోవట్లేదా..?

(Representational Image)

నా వయసు 33 సంవత్సరాలు. పెళ్లై ఆరేళ్లవుతోంది. పెళ్లికి ముందు నాకు ఒక వ్యక్తి పరిచయమయ్యాడు. కొద్ది రోజులకే మేము మంచి స్నేహితులుగా మారాం. నేను అప్పుడే నా వృత్తిగత జీవితాన్ని ప్రారంభించాను. అతను మాస్టర్స్‌ చేస్తున్నాడు. అలా మూడు సంవత్సరాల పాటు మంచి ఫ్రెండ్స్‌గా ఉన్నాం. పెళ్లైన తర్వాత నా భర్త ఉద్యోగరీత్యా వేరే ప్రాంతానికి వెళ్లాం. ఆ తర్వాత పనుల్లో బిజీగా మారడంతో నా స్నేహితులతో మాట్లాడడం చాలావరకు తగ్గించాను. కానీ అతనితో మాత్రం అప్పుడప్పుడు సామాజిక మాధ్యమాల్లో చాట్‌ చేసేదాన్ని. న్యూ ఇయర్‌, పుట్టినరోజు వంటి ప్రత్యేక సందర్భాల్లో మాత్రమే ఫోన్‌లో మాట్లాడుకునేవాళ్లం. అలా గత వారం ఓసారి ఫోన్‌లో మాట్లాడుకున్నాం. అతనికి ఇంకా పెళ్లి కాలేదు. అతని వయసు 37 సంవత్సరాలు. దాంతో నేను ఎప్పుడూ ‘పెళ్లి కాని ప్రసాదూ!’ అని టీజ్‌ చేసేదాన్ని. అలానే ఈసారి కూడా చేశాను. అప్పుడు అతను సడన్‌గా ‘నువ్వు ఎందుకు పెళ్లి చేసుకున్నావు?’ అని అడిగాడు. ‘పెళ్లి చేసుకోవాలనుకున్నాను.. కాబట్టి చేసుకున్నాను’ అని చెప్పాను. అందుకు ‘నేను వేరే ఎవరినీ పెళ్లి చేసుకోవాలనుకోలేదు..’ అని బదులిచ్చాడు. దాంతో ఒక్కసారిగా నా నోట మాట ఆగిపోయింది. మేము మొదట కలిసినప్పటి నుంచి అతను నన్ను ప్రేమిస్తున్నాడనిపించింది. చాలాసార్లు అలాంటి సంకేతాలు అతడి నుంచి వచ్చినా నేను పట్టించుకోలేదు. అతను చాలా మంచి వ్యక్తి, సున్నిత మనస్కుడు. అతను మరొకరి ప్రేమను పొందలేకపోవడానికి నేను కారణం కావాలనుకోవడం లేదు. కానీ ఈ విషయం అతనితో ఎలా చెప్పాలి? దయచేసి సలహా ఇవ్వగలరు. - ఓ సోదరి

జ. మిమ్మల్ని ఆ వ్యక్తి ప్రేమిస్తున్నానని నేరుగా మీతోనే చెప్పినట్టుగా మీరు ఎక్కడా ప్రస్తావించలేదు. అలాగే గతంలో జరిగిన సంఘటనలను ఇప్పుడు ప్రేమ సంకేతాలుగా భావిస్తున్నారు. మీ వల్లే అతను పెళ్లి చేసుకోలేదని, దానివల్ల అతను మరొకరి ప్రేమను పొందలేకపోతున్నారని అనుకుంటున్నారు. మీరు ఒక వైవాహిక బంధంలో ఉన్నారన్న విషయాన్ని గుర్తు పెట్టుకోండి. అలాగే మీరు ఎవరి జీవితానికి బాధ్యులు కారు. కానీ, మీ జీవితానికి మాత్రం మీరే బాధ్యులు అవుతారు.

మీరు వైవాహిక బంధంలోకి అడుగుపెట్టాలనుకున్నారు. కాబట్టి పెళ్లి చేసుకున్నారు. కానీ అతను అలా అనుకోవడం లేదు. కాబట్టి, పెళ్లికి దూరంగా ఉంటున్నారు. ఇది అతని వ్యక్తిగత నిర్ణయం. అతని నిర్ణయానికి మిమ్మల్ని నిందించుకోవాల్సిన అవసరం లేదు. ఆ విషయాన్ని అక్కడితో కట్ చేయండి.. ఎప్పుడో జరిగిన దాని గురించి.. అందులోనూ మీ ప్రమేయం లేని దాని గురించి ఆలోచించి టైం వేస్ట్ చేసుకోవద్దు. మీ కెరీర్ పైన, జీవితం పైన దృష్టి పెట్టండి. అలాగే అతనితో మాట్లాడడం కూడా తగ్గించండి.