Telangana news: తుక్కు దుకాణానికి పాఠ్యపుస్తకాలు.. పోలీసులకు సమాచారమిచ్చిన తల్లిదండ్రులు

న్యూస్‌టుడే, అచ్చంపేట న్యూటౌన్‌: ప్రభుత్వ గిరిజన ఆశ్రమ పాఠశాల విద్యార్థులకు అందాల్సిన పాఠ్యపుస్తకాలు స్క్రాప్‌ దుకాణానికి చేరిన ఉదంతమిది. బుధవారం సాయంత్రం నాగర్‌కర్నూల్‌ జిల్లా అచ్చంపేట పట్టణంలోని ఉట్ల కోనేరు సమీపంలోని ఓ స్క్రాప్‌ దుకాణంలో గత విద్యాసంవత్సరానికి సంబంధించిన 6వ తరగతి నుంచి 10వ తరగతి వరకు ఆంగ్ల మాధ్యమ పుస్తకాలు సీలు కూడా తీయకుండా ఉండటం గమనించిన కొందరు తల్లిదండ్రులు పోలీసులకు సమాచారమిచ్చారు. 45 కట్టల పుస్తకాలను పోలీసులు ఠాణాకు తరలించారు. జిల్లా గిరిజన అభివృద్ధి అధికారి(డీటీడీవో) కార్యాలయ ఉద్యోగి శంకర్‌ వాటిని విక్రయించినట్లు దుకాణం నిర్వాహకుడు తెలిపారు. డీటీడీవో కమలాకర్‌రెడ్డిని వివరణ కోరగా పుస్తకాల పక్కదారిపై పూర్తిస్థాయి విచారణ చేసి.. జిల్లా కలెక్టర్‌కు నివేదిక ఇస్తానని పేర్కొన్నారు.