విప్లవ పోరాటాల అణచివేతకు కేంద్రం కుట్ర: విరసం

బాగ్‌లింగంపల్లి, న్యూస్‌టుడే: దండకారణ్యంలో విప్లవ పోరాటాలతోపాటు ప్రజాసంఘాలను అణచివేయడమే లక్ష్యంగా కేంద్ర ప్రభుత్వం కుట్రలు పన్నుతోందని విరసం తెలుగు రాష్ట్రాల అధ్యక్షుడు అరసవిల్లి కృష్ణ ఆరోపించారు. గురువారం హైదరాబాద్‌లోని సుందరయ్య కళానిలయంలో.. విప్లవ రచయితల సంఘం(విరసం) 55వ ఆవిర్భావ దినోత్సవాన్ని పురస్కరించుకుని ‘వికసిత భారత్‌జీ  2047- కార్పొరేట్‌ హిందూ రాష్ట్రం’ పేరిట సదస్సు జరిగింది. కృష్ణ మాట్లాడుతూ.. ఈ నెల 1న కేంద్రం కొత్తగా క్రూరమైన చట్టాలను తెచ్చిందన్నారు. 

• దండకారణ్యంలో చిన్నారులపై జరుగుతున్న మారణకాండను నిరసిస్తూ హైదరాబాద్‌కు చెందిన ఇద్దరు పిల్లలు నాటకాన్ని ప్రదర్శించారు. ఈ క్రమంలో చిన్నారుల హక్కులను కాలరాస్తున్నారంటూ.. పిల్లలిద్దరితోపాటు వారి తండ్రి బాలును పోలీసులు తీసుకెళ్లారు. దీంతో కొంతసేపు ఉద్రిక్తత నెలకొంది. ఆ తర్వాత న్యాయవాదులు వారిని తిరిగి సుందరయ్య కళానిలయం వద్దకు తీసుకొచ్చారు.