నాకు దక్కాల్సిన స్థలం.. బంధువులు పట్టా చేసుకున్నారు!

 కరీంనగర్‌లో ప్రజావాణి వద్ద వృద్ధుడి నిరసన

వృద్ధుడిని బయటకు తీసుకెళుతున్నసెక్యూరిటీ సిబ్బంది

కరీంనగర్‌ కలెక్టరేట్, న్యూస్‌టుడే: తనకు దక్కాల్సిన ఆస్తిని బంధువులు అక్రమంగా తీసుకున్నారని ఆరోపిస్తూ.. తనకు తిరిగి ఇప్పించాలని కోరుతూ కరీంనగర్‌లో ప్రజావాణికి వచ్చిన ఓ వృద్ధుడు సోమవారం నిరసనకు దిగారు. ఈ మేరకు హుజూరాబాద్‌ మండలం రాంపురానికి చెందిన కన్నం వెంకటయ్య.. అదే గ్రామంలో తన తల్లి పేరిట ఇల్లు, ఇంటి స్థలం పట్టా ఉండేదని, సొంత బంధువులు తనకు తెలియకుండానే పట్టా మార్పిడి చేసుకున్నారని ఆరోపించారు. చాలాసార్లు ప్రజావాణిలో మొరపెట్టుకున్నా అధికారులు కనికరించడం లేదని వాపోయారు. ప్రజావాణికి వచ్చిన వెంకటయ్య ఈ విషయమై అధికారులతో వాగ్వాదానికి దిగగా.. పోలీసులు వెళ్లమని సూచించారు. అతను అక్కడే కూర్చొని నిరసనకు దిగారు. సెక్యూరిటీ సిబ్బంది వెంకటయ్యను ప్రజావాణి గది బయటకు బలవంతంగా తీసుకెళ్లారు. ప్రజావాణి పూర్తయ్యేవరకు మూడు గంటల పాటు వృద్ధుడు నేలపై పడుకొని నిరసన తెలిపారు. అనంతరం తిరిగి ఇంటికి వెళ్లిపోయారు. ఈ విషయంపై ‘న్యూస్‌టుడే’ కరీంనగర్‌ ఆర్డీవోను సంప్రదించగా వెంకటయ్య పేరు మీద ఎలాంటి టైటిల్‌ లేదని తెలిపారు.