7 నుంచి నేతన్న పోరుయాత్ర

తెలంగాణ చేనేత, మరమగ్గాల కార్మిక సంఘాలు  

ఈనాడు, హైదరాబాద్‌: రాష్ట్రంలోని చేనేత, మరమగ్గాల కార్మికుల సంక్షేమానికి బడ్జెట్‌లో నిధులు కేటాయించాలంటూ ‘మగ్గం నడవాలి-నేతన్న బతకాలి’ నినాదంతో ఈ నెల 7వ తేదీ నుంచి నేతన్న పోరుయాత్ర నిర్వహిస్తున్నట్లు సీఐటీయూ అనుబంధ చేనేత, మరమగ్గాల కార్మిక సంఘాల నేతలు ప్రకటించారు. రాష్ట్రంలోని అన్ని చేనేత, మరమగ్గాల కేంద్రాల మీదుగా కొనసాగే ఈ యాత్ర సిరిసిల్లలో ప్రారంభమవుతుందని, ఈ నెల 15న హైదరాబాద్‌ ఇందిరాపార్కు వద్ద ‘చలో హైదరాబాద్‌’ పేరిట ‘నేతన్న గర్జన’ నిర్వహిస్తున్నామని వివరించారు. సోమవారం హైదరాబాద్‌లో మాజీ ఎమ్మెల్సీ చెరుపల్లి సీతారాములు, సీఐటీయూ రాష్ట్ర ప్రధాన కార్యదర్శి పాలడుగు భాస్కర్, చేనేత కార్మిక సంఘం రాష్ట్ర అధ్యక్షుడు వనం శాంతికుమార్, మరమగ్గాల కార్మిక సంఘం రాష్ట్ర ప్రధాన కార్యదర్శి కూరపాటి రమేశ్‌లు విలేకరులతో మాట్లాడారు. గత ప్రభుత్వం నేత, చేనేత కార్మికుల కోసం అమలుచేసిన పథకాలు కాంగ్రెస్‌ సర్కారు వచ్చాక ఆగిపోయాయన్నారు. ప్రభుత్వం వెంటనే కార్మికుల సమస్యలను పరిష్కరించాలని వారు కోరారు.