ములుగు జిల్లాకు ‘సమ్మక్క సారలమ్మ’ పేరు!

అభ్యంతరాలు, సూచనల  స్వీకరణకు రేపు గ్రామసభలు

ఈనాడు డిజిటల్, జయశంకర్‌ భూపాలపల్లి - న్యూస్‌టుడే, ములుగు: ములుగు జిల్లా పేరును ‘సమ్మక్క సారలమ్మ ములుగు’గా మార్చేందుకు అడుగులు పడుతున్నాయి. ఈ మేరకు ప్రభుత్వం నుంచి నోటిఫికేషన్‌ జారీ అయ్యింది. పేరు మార్పునకు అభ్యంతరాలు, సూచనల స్వీకరణకు బుధవారం జిల్లా వ్యాప్తంగా ప్రత్యేక గ్రామ సభలు నిర్వహిస్తున్నట్లు జిల్లా పాలనాధికారి టి.ఎస్‌.దివాకర సోమవారం ప్రకటన విడుదల చేశారు. మంత్రి సీతక్క ప్రతిపాదనల మేరకు పబ్లిక్‌ నోటీసు విడుదల చేసినట్లు పేర్కొన్నారు. ఈ విషయంలో అభిప్రాయాలను గ్రామసభల్లో తెలుగు, ఆంగ్లం, ఉర్దూ భాషల్లో లిఖిత పూర్వకంగా తెలియజేయాలని సూచించారు. వాటిని పరిశీలించి ప్రభుత్వం తుది నిర్ణయం తీసుకుంటుంది.