పంచాయతీ భవనాల కోసం రూ.1,544 కోట్లు అవసరం

కేంద్ర మంత్రికి రాష్ట్ర మంత్రి సీతక్క వినతి 

ఈనాడు, దిల్లీ: తెలంగాణలో గ్రామ పంచాయతీ భవనాల నిర్మాణానికి రూ.1,544 కోట్లు మంజూరు చేయాలని రాష్ట్ర గ్రామీణాభివృద్ధి, పంచాయతీరాజ్‌శాఖ మంత్రి సీతక్క కేంద్రమంత్రి రాజీవ్‌ రంజన్‌సింగ్‌ను కోరారు. ఆమె మంగళవారం ఇక్కడ కేంద్రమంత్రిని ఆయన కార్యాలయంలో కలిసి వినతిపత్రం సమర్పించారు. తెలంగాణలో 6,176 గ్రామపంచాయతీలకు భవనాలు లేవని ఆమె తెలిపారు. ప్రస్తుతం అవన్నీ తాత్కాలిక భవనాల్లో నడుస్తున్నందున సిబ్బందికి ఇబ్బందులు ఎదురవుతున్నట్లు చెప్పారు. రాష్ట్రీయ గ్రామ స్వరాజ్‌ అభియాన్‌ కింద ఈ భవనాల నిర్మాణానికి నిధులివ్వాలని కోరారు. జల్‌జీవన్‌ మిషన్‌ కింద తెలంగాణలో పది లక్షల ఇళ్లకు రక్షిత మంచినీటి సౌకర్యం కల్పించేందుకు నిధులివ్వాలని సీతక్క కేంద్ర జలశక్తి మంత్రి సీఆర్‌ పాటిల్‌ను కోరారు. ఆమె మంగళవారం ఆయనను కలిసి రాష్ట్ర అవసరాలను వివరించారు. తెలంగాణ గ్రామీణ ప్రాంతాల్లో ఇప్పటికే 53.98 లక్షల ఇళ్లకు మంచినీటి సౌకర్యం కల్పించారని, కొత్త ఆవాసాలు, ఇళ్లకు కుళాయిల ద్వారా నీటి సౌకర్యం కల్పించడానికి నిధులు మంజూరు చేయాలని విజ్ఞప్తి చేశారు.