మద్దతు ధరలకు చట్టబద్ధత కల్పించాలి

దేశవ్యాప్తంగా రుణమాఫీ అమలు చేయాలి
సంయుక్త కిసాన్‌ మోర్చా నేతల డిమాండ్‌

విలేకరులతో మాట్లాడుతున్న వడ్డే శోభనాద్రీశ్వరరావు. చిత్రంలో సాగర్, విస్సా కిరణ్‌కుమార్, కన్నెగంటి రవి

ఈనాడు, హైదరాబాద్‌: కేంద్ర ప్రభుత్వం పంటల కనీస మద్దతు ధర (ఎమ్మెస్పీ)లకు చట్టబద్ధత కల్పించాలని.. ప్రతి రైతుకు అవి దక్కేలా చూడాలని.. దేశవ్యాప్తంగా పంటల రుణమాఫీని అమలు చేయాలని సంయుక్త కిసాన్‌ మోర్చా (ఎస్‌కేఎం) నేతలు డిమాండ్‌ చేశారు. దీనికోసం రాష్ట్ర ప్రభుత్వాలు లేఖలు రాసి కేంద్రంపై ఒత్తిడి తేవాలన్నారు. హైదరాబాద్‌లో మోర్చా జాతీయ నేత వడ్డే శోభనాద్రీశ్వరరావు, రాష్ట్ర నేతలు విస్సా కిరణ్‌కుమార్, టి.సాగర్, మురళీధర్‌రెడ్డి, బి.కొండల్, కన్నెగంటి రవి, మండల వెంకన్న తదితరులు మంగళవారం విలేకరులతో మాట్లాడారు. ‘‘కేంద్రం ప్రకటించిన ఖరీఫ్‌- 2024 కనీస మద్దతు ధరలు రైతులను నిరాశపరిచాయి. చాలా పంటలకు ధరల పెంపుదల కేవలం 5 నుంచి 7 శాతమే ఉంది. పెసరకు 1.4% మాత్రమే పెంచారు. ఎమ్మెస్పీకి చట్టబద్ధమైన హామీ ఇవ్వాలన్న రైతుల డిమాండ్లను మోదీ ప్రభుత్వం విస్మరిస్తోంది. రైతులకు రుణాల నుంచి ఉపశమనం కలిగించాల్సిన బాధ్యత కేంద్రానిదే. దీనికోసం తెలంగాణ, ఆంధ్రప్రదేశ్‌ సహా అన్ని రాష్ట్ర ప్రభుత్వాలు కేంద్రంపై ఒత్తిడి తేవాలి. ఏ రాష్ట్ర ప్రభుత్వానికైనా రుణమాఫీ ఆర్థికభారం ఉంటుందని తెలంగాణ అనుభవం తెలియజేస్తోంది. రైతులకు రుణమాఫీ చేయాల్సిన బాధ్యత కేంద్రంపై ఉంది.

జులై 10న కార్యాచరణ 

రైతుల దేశవ్యాప్త డిమాండ్లను పట్టించుకోని కేంద్ర ప్రభుత్వ విధానాలపై ఎలా ఒత్తిడి తీసుకురావాలనే విషయమై జులై 10న జరిగే సమావేశంలో అన్ని సంఘాలు నిర్ణయం తీసుకుంటాయి’’ అని సంయుక్త కిసాన్‌ మోర్చా నేతలు తెలిపారు.