వావ్‌.. జీపీటీ-4ఓ!

అభివృద్ధి దశలోనే జీపీటీ-4ఓ అబ్బురపరుస్తోంది. మున్ముందు మరింత మెరుగై ఇంకెన్ని అద్భుతాలు సృష్టిస్తుందో చూడాలి.

ఓపెన్‌ ఏఐ సంస్థ ఇటీవల అధునాతన లార్జ్‌ లాంగ్వేజ్‌ మోడల్‌(ఎల్‌ఎల్‌ఎం)ను పరిచయం చేసింది. దీని పేరు జీపీటీ-4ఓ. ఛాట్‌జీపీటి ద్వారా దీన్ని ఎవరైనా వాడుకోవచ్చు. జీపీటీ-4 కన్నా ఎక్కువ సామర్థ్యాలు గల దీనిలోని కొన్ని ఫీచర్లేంటో చూద్దాం.

• ఫేషియల్‌ రికగ్నిషన్‌: అప్‌లోడ్‌ చేసిన ఫొటోలలో ఉన్న మనుషుల ముఖాలను విశ్లేషించి, వాటికి సంబంధించిన సమాచారాన్ని అందిస్తుంది. ఆయా ఫొటోలకు సంబంధించి ప్రశ్నలను అడిగినా జవాబులు ఇవ్వగలదు.
• చేతిరాత విశ్లేషణ: చేత్తో రాసిన డాక్యుమెంట్ల ఇమేజ్‌లను అప్‌లోడ్‌ చేసినా వాటిని విశ్లేషిస్తుంది. తేలికగా అర్థం చేసుకోవటానికి తోడ్పడుతుంది.
• ఇమేజ్‌ వివరణ: ఎలాంటి ఇమేజ్‌లను అప్‌లోడ్‌ చేసినా జీపీటీ-4ఓ వాటిని వివరించగలదు.
• ఆహార సలహా: తినే భోజనానికి సంబంధించిన ఫొటోలను దీనికి షేర్‌ చేస్తే కేలరీల మోతాదును అంచనా వేయగలదు. ఆరోగ్యం మీద శ్రద్ధ తీసుకునేవారికిది ఎంతో అనువు.
• లొకేషన్‌ గుర్తింపు: తెలియని చోట్లకు సంబంధించిన ఫొటోలను అప్‌లోడ్‌ చేశారనుకోండి. అవి ఏ ప్రాంతానికి చెందినవో కచ్చితంగా గుర్తిస్తుంది.
• అనువాద సహాయం: ఇమేజెస్‌లో ఎలాంటి భాషలనైనా తక్షణం అనువాదం చేయగలదు. భాష తెలియని చోట్ల ప్రయాణాలు చేసేవారికిది ఉపయుక్తం.
• సంస్కృతి అవగాహన: ఆయా సంస్కృతులకు చెందిన ఫొటోలను కూడా జీపీటీ-4ఓ విశ్లేషిస్తుంది. విద్యార్థులకిది చేదోడుగా నిలుస్తుంది.
• వీడియో విశ్లేషణ: ఇది ప్రత్యక్ష వీడియోలనూ విశ్లేషించగలదనీ ఓపెన్‌ ఏఐ ప్రదర్శించింది. అయితే ఈ ఫీచర్‌ను ఇంకా విడుదల చేయలేదు.