వాతావరణ మార్పును వింటారా?

డేటా అనగానే అంకెలు, గ్రాఫ్‌లే గుర్తుకొస్తాయి. దీన్ని సంగీతంగా మారిస్తే? జపాన్‌ శాస్త్రవేత్త హిటోరీ నగాయ్‌ అలాంటి విచిత్రమే చేసి చూపించారు. అర్కిటిక్, అంటార్కిటికా నుంచి 30 ఏళ్లుగా ఉపగ్రహాలు సేకరించిన వాతావరణ సమాచారాన్ని ఆరు నిమిషాల పాటగా మార్చారు. దీనికి ‘స్ట్రింగ్‌ క్వార్టర్‌ నం.1 పోలార్‌ ఎనర్జీ బడ్జెట్‌’ అని నామకరణం చేశారు. ఆయన ముందుగా డేటాను శబ్దం రూపంలోకి (సోనిఫికేషన్‌) మలచారు. డేటా విలువల ఆధారంగా వాటికి శబ్దాల స్థాయులను కేటాయించారు. వీటి ఆధారంగా వయొలిన్, వయోలా, సెల్లో వాయిద్యాలతో నలుగురు కళాకారులు పాటగా మలచారు. సంగీతం ద్వారా వాతావరణ మార్పు సంక్లిష్టతలను వ్యక్తం చేయటం హిటోరీ నగాయ్‌ ఉద్దేశం.