Rohit Sharma: అంతర్జాతీయ టీ20 క్రికెట్‌కు రోహిత్‌ శర్మ వీడ్కోలు

ఇంటర్నెట్‌ డెస్క్‌: భారత కెప్టెన్‌, స్టార్‌ ఆటగాడు రోహిత్ శర్మ అంతర్జాతీయ టీ20 క్రికెట్‌కు రిటైర్మెంట్‌ ప్రకటించాడు. దక్షిణాఫ్రికాతో ఫైనల్‌లో గెలిచిన అనంతరం రోహిత్‌ ఈ ప్రకటన చేశాడు. వీడ్కోలు పలకడానికి ఇదే సరైన సమయమని రోహిత్‌ పేర్కొన్నాడు. రోహిత్‌ ప్రకటించడానికి కొన్నినిమిషాల ముందు స్టార్‌ బ్యాటర్‌ విరాట్‌ కోహ్లీ అంతర్జాతీయ టీ20కి వీడ్కోలు పలికాడు. దీంతో ఒకేరోజు ఇద్దరు స్టార్‌ ఆటగాళ్లు టీ20 బరి నుంచి తప్పుకోవడం భారత క్రికెట్‌ చరిత్రలో మరిచిపోలేని రోజుగా మిగిలిపోనుంది.      

టీ20లకు రిటైర్మెంట్ ప్రకటించిన విరాట్ కోహ్లీ

మ్యాచ్‌ అనంతరం నిర్వహించిన ప్రెస్‌ కాన్ఫరెన్స్‌లో రోహిత్‌ మాట్లాడుతూ.. ‘‘టీ20లకు ఇదే నా చివరి మ్యాచ్‌. వీడ్కోలుకు ఇంతకుమించి ప్రకటించే మంచి సందర్భం లేదు. ఈ ట్రోఫీ కచ్చితంగా గెలవాలనుకున్నా. ఈ విషయం ప్రకటిస్తున్నందుకు మాటలు రావడం లేదు. నేను కోరుకున్నదే జరిగింది. ఈ సందర్భం రావడానికి నా జీవితంలో ఎంతో ఎదురుచూశాను. ఎంతో నిరాశకు గురయ్యాను. ఎట్టకేలకు ఆ హద్దులు దాటి వచ్చినందుకు చాలా ఆనందంగా ఉంది’’ అని 37 ఏళ్ల రోహిత్‌ పేర్కొన్నాడు. ఇక అంతర్జాతీయ టీ20 క్రికెట్‌లో 159 మ్యాచ్‌లు ఆడిన రోహిత్‌.. 4231 పరుగులు చేశాడు. ఇందులో ఐదు శతకాలు, 32 అర్ధశతకాలు ఉన్నాయి. రోహిత్‌ సారథ్యంలోనే భారత్‌ వన్డేలు, టెస్టు మ్యాచ్‌లు ఆడనుంది.