జకోవిచ్‌ జోరు.. ఒసాకా ఔట్‌

వింబుల్డన్‌

లండన్‌: వింబుల్డన్‌లో టైటిల్‌ ఫేవరెట్‌ నొవాక్‌ జకోవిచ్‌ (సెర్బియా) జోరు కొనసాగుతోంది. ఈ రెండోసీడ్‌ మూడో రౌండ్‌ చేరాడు. గురువారం జకో 6-3, 6-4, 5-7, 7-5తో ఫియర్న్‌లే (బ్రిటన్‌)పై నెగ్గాడు. మ్యాచ్‌లో 14 ఏస్‌లు కొట్టిన జకో.. నాలుగుసార్లు ప్రత్యర్థి సర్వీస్‌ బ్రేక్‌ చేశాడు. హోరాహోరీగా సాగిన మరో పోరులో ప్రపంచ నం.1 జానిక్‌ సిన్నర్‌ (ఇటలీ) 7-6 (7-3), 7-6 (7-4), 2-6, 7-6 (7-4)తో సహచరుడు 2021 రన్నరప్‌ బెరెటినిపై విజయం సాధించి మూడో రౌండ్‌ చేరాడు.స్విస్‌ స్టార్‌ వావ్రింకా 6-7 (5-7), 4-6, 6-7 (3-7)తో మోన్‌ఫిల్స్‌ (ఫ్రాన్స్‌) చేతిలో కంగుతిన్నాడు. ఏడోసీడ్‌ హర్కాజ్‌ (పోలెండ్‌) 6-7 (2-7), 4-6, 6-2, 6-6 (8-9)తో ఫిల్స్‌ (ఫ్రాన్స్‌)తో మ్యాచ్‌లో వెనకబడిన దశలో గాయం కారణంగా మ్యాచ్‌ను వదులుకున్నాడు. నోరి (బ్రిటన్‌), డిమెనార్‌ (ఆస్ట్రేలియా) మూడో రౌండ్‌ చేరారు. 

ఒసాకాకు షాక్‌: నాలుగుసార్లు గ్రాండ్‌స్లామ్‌ ఛాంపియన్‌ నవోమి ఒసాకా (జపాన్‌) రెండో రౌండ్లోనే నిష్క్రమించింది. ఏకపక్షంగా సాగిన మ్యాచ్‌లో 19వ సీడ్‌ ఎమ్మా నవారో 6-4, 6-1తో ఒసాకాను ఓడించింది. మరోవైపు టైటిల్‌ ఫేవరెట్‌ స్వైటెక్‌ (పోలెండ్‌) మూడో రౌండ్‌ చేరింది. ఆమె 6-4, 6-3తో మార్టిచ్‌ (క్రొయేషియా)ను ఓడించింది. అయిదోసీడ్‌ పెగులా (అమెరికా) ఓడిపోయింది. ఆమె 4-6, 7-6 (9-7), 1-6తో వాంగ్‌ (చైనా) చేతిలో కంగుతింది. జాబెర్‌ (ట్యునీసియా), రిబకినా (కజకిస్థాన్‌), బౌజాస్‌ (స్పెయిన్‌), డార్ట్‌ (బ్రిటన్‌) కూడా రెండో రౌండ్‌ దాటారు. 

బోపన్న జోడీ శుభారంభం: పురుషుల డబుల్స్‌లో రోహన్‌ బోపన్న, మాథ్యూ ఎబ్డెన్‌ (ఆస్ట్రేలియా) జోడీ రెండో రౌండ్‌కు దూసుకెళ్లింది. తొలి రౌండ్లో రెండోసీడ్‌ బోపన్న ద్వయం 7-5, 6-4తో రాబిన్‌ హాస్, సాండర్‌ అరెండ్స్‌ (నెదర్లాండ్స్‌)ను ఓడించింది. నిరుడు బోపన్న, ఎబ్డెన్‌ జంట వింబుల్డన్‌లో సెమీఫైనల్‌ చేరింది. మరోవైపు యుకి బాంబ్రి, అల్బానో ఒలివెట్టి (ఫ్రాన్స్‌) జంట 6-4, 6-4తో అలెగ్జాండర్‌ బుబ్లిక్, అలెగ్జాండర్‌ షెవ్‌చెంకో (కజకిస్థాన్‌)పై విజయం సాధించగా.. శ్రీరామ్‌ బాలాజీ, జాన్సన్‌ (బ్రిటన్‌) జోడీ 4-6, 5-7తో నాలుగో సీడ్‌ మార్సెలో అలెవారో, మాట్‌ పవిచ్‌ (క్రొయేషియా) చేతిలో పరాజయంపాలైంది.