శ్రీలంకతో సిరీస్‌లో కొత్త కోచ్‌ బాధ్యతలు

బ్రిడ్జ్‌టౌన్‌: శ్రీలంకతో సిరీస్‌లో భారత జట్టు కొత్త చీఫ్‌ కోచ్‌ బాధ్యతలు స్వీకరిస్తాడని బీసీసీఐ కార్యదర్శి జై షా తెలిపాడు. ఈ నెలలో జింబాబ్వే పర్యటనకు వీవీఎస్‌ లక్ష్మణ్‌ చీఫ్‌ కోచ్‌గా వ్యవహరిస్తాడని చెప్పాడు. కోచ్‌ పదవికి ఇప్పటికే ఇంటర్వ్యూలు నిర్వహించిన క్రికెట్‌ సలహా కమిటీ (సీఏసీ).. గంభీర్, డబ్ల్యూవీ రామన్‌ పేర్లతో జాబితాను రూపొందించింది. ‘‘త్వరలోనే కోచ్, సెలెక్టర్ల నియామకం ఉంటుంది. సీఏసీ ఇద్దరి పేర్లతో జాబితా తయారు చేసింది. వారి సూచన మేరకు నిర్ణయం తీసుకుంటాం. శ్రీలంకతో సిరీస్‌లో కొత్త కోచ్‌ బాధ్యతలు స్వీకరిస్తాడు. ప్రపంచ టెస్టు ఛాంపియన్‌షిప్‌ ఫైనల్, ఛాంపియన్స్‌ ట్రోఫీలను లక్ష్యంగా నిర్దేశించుకున్నాం. సీనియర్లంతా ఆడతారు. టీ20ల్లో రోహిత్‌ వారసుడు ఎవరన్నది సెలెక్టర్లు నిర్ణయిస్తారు. వాళ్లతో చర్చించాక నిర్ణయం ప్రకటిస్తాం’’ అని జై షా వివరించాడు.