కోర్టులోనే కుప్పకూలిన 17 ఏళ్ల షట్లర్‌

దిల్లీ: ఆసియా జూనియర్‌ బ్యాడ్మింటన్‌ ఛాంపియన్‌షిప్స్‌లో ఆడుతూనే కోర్టులో కుప్పకూలిన 17 ఏళ్ల చైనా షట్లర్‌ జాంగ్‌ జిజీ మరణంపై భారత స్టార్‌ పీవీ సింధు తీవ్ర విచారం వ్యక్తం చేసింది. ఈ వార్తతో తన హృదయం ముక్కలైందని ఆమె తెలిపింది. ‘‘బ్యాడ్మింటన్‌ యువ ఆటగాడు ఆసియా జూనియర్‌ ఛాంపియన్‌షిప్‌ సందర్భంగా మరణించాడనే వార్తతో నా హృదయం ముక్కలైంది. ఈ కష్ట కాలంలో జాంగ్‌ కుటుంబానికి తీవ్రమైన సానుభూతి వ్యక్తం చేస్తున్నా. ఓ అద్భుతమైన ప్రతిభను ప్రపంచం కోల్పోయింది’’ అని ఎక్స్‌లో సింధు పోస్టు చేసింది. ఆదివారం రాత్రి జపాన్‌ ఆటగాడు కజుమాతో సింగిల్స్‌లో జాంగ్‌ తలపడ్డాడు. తొలి గేమ్‌లో స్కోరు 11-11తో ఉండగా అస్వస్థత కారణంగా జాంగ్‌ కోర్టులో కుప్పకూలాడు. వెంటనే అతనికి ప్రథమ చికిత్స అందించి, అంబులెన్స్‌లో దగ్గర్లోని ఆసుపత్రికి తరలించారు. అయినా ప్రయోజనం లేకపోయింది.