Indian wrestling: అవార్డులు వెనక్కిచ్చేసిన వినేశ్‌

దిల్లీ: స్టార్‌ రెజ్లర్‌ వినేశ్‌ ఫొగాట్‌ తన ఖేల్‌రత్న, అర్జున అవార్డులను శనివారం వెనక్కిచ్చేసింది. అవార్డులను ప్రధాని నరేంద్ర మోదీకి అందజేసేందుకు బయల్దేరిన ఆమెను పోలీసులు అడ్డుకోవడంతో.. కర్తవ్య పథ్‌ వద్ద వాటిని వదిలేసింది. పోలీసులు అవార్డులను స్వాధీనం చేసుకున్నారు. బ్రిజ్‌భూషణ్‌ సింగ్‌ సన్నిహితుడు సంజయ్‌ సింగ్‌ భారత రెజ్లింగ్‌ సమాఖ్య (డబ్ల్యూఎఫ్‌ఐ) అధ్యక్షుడిగా ఎన్నికవడాన్ని నిరసిస్తూ.. అవార్డులను వదులుకుంటానని వినేశ్‌ ఇంతకుముందే ప్రకటించింది. నిబంధనలను పాటించనందుకు డబ్ల్యూఎఫ్‌ఐని క్రీడా మంత్రిత్వ శాఖ సస్పెండ్‌ చేసిన సంగతి తెలిసిందే. సమాఖ్యను నడిపించడానికి ఐఓఏ.. అడ్‌హక్‌ కమిటీని ఏర్పాటు చేసింది.