Tilak Varma: మెరిసిన తిలక్‌వర్మ

హైదరాబాద్‌కు రెండో విజయం

జైపుర్‌: తిలక్‌వర్మ (58 నాటౌట్‌; 43 బంతుల్లో 3×4, 3×6) సత్తా చాటడంతో సయ్యద్‌ ముస్తాక్‌అలీ ట్రోఫీలో హైదరాబాద్‌ వరుసగా రెండో విజయం సాధించింది. మంగళవారం గ్రూప్‌-ఏ మ్యాచ్‌లో హైదరాబాద్‌ 8 వికెట్ల తేడాతో జమ్ముకశ్మీర్‌ను చిత్తు చేసింది. మొదట జమ్ముకశ్మీర్‌ 20 ఓవర్లలో 8 వికెట్లకు 159 పరుగులు చేసింది. శుభమ్‌ (58) టాప్‌ స్కోరర్‌. రవితేజ, మిలింద్‌, రక్షణ్‌ తలో రెండు వికెట్లు పడగొట్టారు. తిలక్‌వర్మ రాణించడంతో లక్ష్యాన్ని హైదరాబాద్‌ 18.3 ఓవర్లలో 2 వికెట్లే కోల్పోయి అందుకుంది. రోహిత్‌ రాయుడు (38), రాహుల్‌ సింగ్‌ (35 నాటౌట్‌), తన్మయ్‌ (20) కూడా సత్తా చాటారు. మరోవైపు గ్రూప్‌-సిలో ఆంధ్ర ఆడిన రెండు మ్యాచ్‌ల్లోనూ ఓడింది. రాంచిలో పంజాబ్‌తో మ్యాచ్‌లో ఆంధ్ర 105 పరుగుల తేడాతో చిత్తయింది. అభిషేక్‌శర్మ (112; 51 బంతుల్లో 9×4, 9×6) మెరుపు సెంచరీకి అన్మోల్‌ప్రీత్‌ సింగ్‌ (87; 26 బంతుల్లో 6×4, 9×6) విధ్వంసక ఇన్నింగ్స్‌ తోడవడంతో మొదట పంజాబ్‌ 275 (6 వికెట్లకు) భారీ స్కోరు చేసింది. ఈ టోర్నీ చరిత్రలో ఒక జట్టు చేసిన అత్యధిక స్కోరు ఇదే. ఛేదనలో రికీభుయ్‌ (104 నాటౌట్‌; 52 బంతుల్లో 6×4, 9×6) శతకంతో పోరాడినా జట్టును గెలిపించలేకపోయాడు. ఆంధ్ర 170/7కే పరిమితమైంది. రాంచిలోనే జరిగిన మరో గ్రూప్‌-సి మ్యాచ్‌లో రైల్వేస్‌ 127 పరుగుల తేడాతో అరుణాచల్‌ప్రదేశ్‌ను ఓడించింది. మొదట రైల్వేస్‌ 5 వికెట్లకు 246 పరుగులు చేసింది. ఉపేంద్ర యాదవ్‌ (103 నాటౌట్‌; 51 బంతుల్లో 6×4, 9×6) మెరుపు సెంచరీ బాదేశాడు. అశుతోష్‌ శర్మ (53; 12 బంతుల్లో 1×4, 8×6) కూడా మెరిశాడు. ఈ క్రమంలో 11 బంతుల్లోనే 50 పరుగుల మైలురాయి చేరిన అశుతోష్‌.. యువరాజ్‌సింగ్‌ను దాటి భారత్‌ తరఫున ఈ ఫార్మాట్లో వేగవంతమైన అర్ధశతకాన్ని సాధించాడు. ఛేదనలో అరుణాచల్‌ప్రదేశ్‌ 18.1 ఓవర్లలో 119కే కుప్పకూలింది.