Team India: వీరులారా.. వందనం

సొంతగడ్డపై టీమ్‌ ఇండియాకు అపూర్వ స్వాగతం   

ఎటు చూసినా జనమే.. అందరి కళ్లలో అభిమానమే. రోడ్లు కిక్కిరిసిపోయాయి..కేరింతలు, చప్పట్లతో పరిసరాలు దద్ధరిల్లిపోయాయి. పూల వర్షం కురిసింది. నినాదాలు మిన్నంటాయి. ఇదీ టీ20 ప్రపంచకప్‌ గెలిచి గురువారం స్వదేశానికి వచ్చిన భారత క్రికెట్‌ జట్టుకు లభించిన అఖండ స్వాగతం. తమ హీరోలకు బ్రహ్మరథం పట్టిన ఫ్యాన్స్‌.. ప్రపంచకప్‌ను చూసి మురిసిపోయారు. బార్బడోస్‌ నుంచి ప్రత్యేక విమానంలో ఉదయం దిల్లీలో దిగిన టీమ్‌ఇండియా.. తర్వాత ప్రధాని మోదీని కలిసింది. ఆపై ముంబయికి వెళ్లి మెరైన్‌ డ్రైవ్‌లో విజయయాత్రలో పాల్గొంది. వాంఖడే స్టేడియంలో నిర్వహించిన వేడుకలో మైదానం చుట్టూ తిరుగుతూ తమను చూసేందుకు భారీగా తరలివచ్చిన అభిమానులకు కృతజ్ఞతలు తెలిపింది.