YS Jagan: జైలుకు వెళ్లి పిన్నెల్లి రామకృష్ణారెడ్డిని కలిసిన జగన్‌

నెల్లూరు: ఈవీఎం ధ్వంసం సహా మరికొన్ని కేసుల్లో అరెస్టయి జైలులో ఉన్న మాచర్ల మాజీ ఎమ్మెల్యే పిన్నెల్లి రామకృష్ణారెడ్డిని వైకాపా అధ్యక్షుడు జగన్‌ పరామర్శించారు. నెల్లూరు జైలుకు వెళ్లి ఆయన్ను కలిశారు. 

మే 13న జరిగిన ఎన్నికల్లో పాల్వాయిగేటు పోలింగ్‌ కేంద్రంలో పిన్నెల్లి రామకృష్ణారెడ్డి ఈవీఎంను ధ్వంసం చేశారు. అడ్డుకునే ప్రయత్నం చేసిన తెదేపా ఏజెంట్‌ నంబూరి శేషగిరిరావుకు వేలు చూపిస్తూ ‘నీ అంతు చూస్తా బయటకు రా’ అని బెదిరించారు. తర్వాత ఆయన అనుచరులు శేషగిరిరావుపై దాడికి పాల్పడ్డారు. అక్కడే ప్రశ్నించబోయిన మరో మహిళను ‘ఏయ్‌.. జాగ్రత్త’ అంటూ పిన్నెల్లి దుర్భాషలాడారు. పదుల సంఖ్యలో అనుచరులను వెంటబెట్టుకుని పోలింగ్‌ కేంద్రాల వద్ద హల్‌చల్‌ చేశారు. మరోవైపు డ్యూటీలో ఉన్న కారంపూడి సీఐపై దాడి చేశారు. వీటన్నింటికీ కూడా సీసీ కెమెరాలు, వీడియో ఫుటేజీలు సాక్ష్యాధారాలుగా ఉన్నాయి. దీంతో పిన్నెల్లిపై 10 సెక్షన్ల కింద పోలీసులు కేసులు నమోదు చేశారు. కనీసం ఆయనకు ఏడేళ్ల జైలుశిక్ష పడే అవకాశం ఉంది. అలాంటి వ్యక్తిని జగన్‌ జైలుకు వెళ్లి మరీ కలవడం చర్చనీయాంశవుతోంది.