Gottipati Ravi Kumar: ఇలాగే చేస్తే.. క్రికెట్‌ టీం కాస్తా వాలీబాల్‌ టీం అవుతుంది: మంత్రి గొట్టిపాటి

ఈనాడు, అమరావతి: జగన్‌ బెదిరింపు రాజకీయాలకు కాలం చెల్లిందని, ఇకనైనా ప్రజాస్వామ్య పద్ధతిలో రాజకీయాలు చేయకపోతే క్రికెట్‌ టీం కాస్తా వాలీబాల్‌ టీం అవుతుందని రాష్ట్ర ఇంధనశాఖ మంత్రి గొట్టిపాటి రవికుమార్‌ విరుచుకుపడ్డారు. సభాపతిని ఉద్దేశించి మంగళవారం జగన్‌ రాసిన లేఖపై ఆయన మండిపడ్డారు. ‘ప్రజలు జగన్‌ను పాతాళానికి తొక్కేసినా చంద్రబాబు పెద్దమనసుతో ఆయనకు గౌరవం ఇవ్వాలని ఆదేశించారు. అందుకే అర్హత లేకున్నా అసెంబ్లీలో గౌరవం లభించింది. ఆయన వాహనాన్ని లోపలకు అనుమతించారు’ అని వివరించారు. ‘జగన్‌మోహన్‌రెడ్డి సభాపతిని లక్ష్యంగా చేసుకుని వక్రభాష్యంతో లేఖ రాశారు. బుద్ధి మారలేదని నిరూపించుకున్నారు’ అని ధ్వజమెత్తారు.