దర్యాప్తు సంస్థల దుర్వినియోగాన్ని ఆపండి

ఇండియా కూటమి ఎంపీల నిరసన

దిల్లీ: ప్రతిపక్ష నేతలను లక్ష్యంగా చేసుకుని దర్యాప్తు సంస్థలను కేంద్ర ప్రభుత్వం దుర్వినియోగపరుస్తోందని, వెంటనే దానిని ఆపాలని ఇండియా కూటమి ఎంపీలు డిమాండు చేశారు. సోమవారం పలువురు ఎంపీలు పార్లమెంటు ఆవరణలో నిరసన తెలిపారు. ప్రతిపక్ష నేత రాహుల్‌ గాంధీతోపాటు తృణమూల్, ఆమ్‌ ఆద్మీ పార్టీ, తదితర పార్టీలకు చెందిన ఎంపీలు పార్లమెంటు మకర ద్వారంవద్ద ఆందోళన నిర్వహించారు. ప్రతిపక్షాల నోళ్లు మూయించేందుకు దర్యాప్తు సంస్థలను ఉసిగొల్పడాన్ని ఆపాలని, భాజపాలో చేరితే అవినీతి మాయమయ్యే చర్యలకు స్వస్తి పలకాలని ప్లకార్డులను ప్రదర్శించారు. జైలులో ఉన్న కేజ్రీవాల్‌ చిత్రాన్ని ఆప్‌ ఎంపీ రాఘవ్‌ చడ్డా ప్రదర్శించారు.