పార్టీ ఫిరాయింపులపై సీఎం తీరు సరికాదు

భాజపా పక్షనేత మహేశ్వర్‌రెడ్డి

ఈనాడు, హైదరాబాద్‌: రాష్ట్రంలో పార్టీ ఫిరాయింపులపై సీఎం రేవంత్‌రెడ్డి వ్యవహరిస్తున్న తీరు ఆక్షేపణీయమని భాజపా శాసనసభా పక్షనేత ఎ.మహేశ్వర్‌రెడ్డి విమర్శించారు. గతంలో పీసీసీ అధ్యక్షుడిగా ఉన్నపుడు పార్టీ మారిన ఎమ్మెల్యేల ఇళ్ల ముందు డప్పులు కొట్టమని చెప్పిన రేవంత్‌.. ఇప్పుడు స్వయంగా కండువాలు కప్పి పార్టీలోకి ఆహ్వానించడం శోచనీయమని మండిపడ్డారు. సోమవారం భాజపా రాష్ట్ర కార్యాలయంలో ముథోల్‌ ఎమ్మెల్యే రామారావుపటేల్‌తో కలిసి మహేశ్వర్‌రెడ్డి విలేకరులతో మాట్లాడారు. ‘‘ఓ పార్టీ ఎమ్మెల్యే మరో పార్టీ నుంచి ఎంపీ అభ్యర్థిగా పోటీ చేయడం చరిత్రలోనే లేదు. ఎమ్మెల్యే దానం నాగేందర్‌పై స్పీకర్‌కు అనర్హత పిటిషన్‌ పంపుతున్నాం. సుప్రీంకోర్టు తీర్పు ప్రకారం పార్టీ మారిన వారిపై 90 రోజుల్లో చర్య తీసుకోవాలి. భాజపాలో చేరేందుకు చాలామంది సిద్ధంగా ఉన్నారు. పదవులకు రాజీనామా చేసి వస్తేనే చేర్చుకుంటాం’’ అని మహేశ్వర్‌రెడ్డి ప్రకటించారు.