రాహుల్‌జీ.. ఉద్యోగ క్యాలెండర్‌ ప్రకటించండి

‘ఎక్స్‌’లో కేటీఆర్‌

ఈనాడు, హైదరాబాద్‌: తెలంగాణలో కాంగ్రెస్‌ ప్రభుత్వం ఏర్పడి ఏడు నెలలు పూర్తి కావచ్చినా.. ఇప్పటి వరకూ ఉద్యోగ క్యాలెండర్‌ ప్రకటించలేదని, కాంగ్రెస్‌ అగ్రనేత రాహుల్‌గాంధీ ఈ విషయంలో జోక్యం చేసుకోవాలని భారాస కార్యనిర్వాహక అధ్యక్షుడు కేటీఆర్‌ కోరారు. రాహుల్‌నుద్దేశించి ‘ఎక్స్‌’ వేదికగా ఆదివారం కేటీఆర్‌ పలు వ్యాఖ్యలు చేశారు. ‘‘ప్రియమైన రాహుల్‌గాంధీజీ.. మీరు వ్యక్తిగతంగా నిరుద్యోగులను కలిశారు. కాంగ్రెస్‌ అధికారంలోకి వచ్చిన మొదటి సంవత్సరంలోనే 2 లక్షల ప్రభుత్వ ఉద్యోగాల భర్తీని పూర్తి చేస్తామని తెలంగాణ యువకులకు హామీ ఇచ్చారు. మీ వాగ్దానాన్ని అనుసరించే తేదీలతో పాటు అన్ని ప్రముఖ వార్తాపత్రికల్లో ‘ఉద్యోగ క్యాలెండర్‌’ కూడా మీ పార్టీ ప్రచురించింది. ఇప్పటికి 7 నెలలు దాటిపోయినా..నూతన ఉద్యోగ నోటిఫికేషన్‌ కూడా జారీ చేయలేదు. ఎలాంటి నోటిఫికేషన్‌లు జారీ చేయకుండానే 2 లక్షల రిక్రూట్‌మెంట్‌ ప్రక్రియను మీ ప్రభుత్వం ఎలా అందిస్తుంది? తెలంగాణ ప్రభుత్వంలో బాధ్యులు ఎవరూ పట్టించుకోనందున దయచేసి స్పందించండి’’ అని కేటీఆర్‌ కోరారు.