ఎమ్మెల్సీ దండె విఠల్‌తో కాంగ్రెస్‌ చర్చలు!

ఈటీవీ, ఆదిలాబాద్‌: ఉమ్మడి ఆదిలాబాద్‌ జిల్లా స్థానిక సంస్థల ఎమ్మెల్సీ దండె విఠల్‌ను కాంగ్రెస్‌లో చేర్చుకునేందుకు ఆ పార్టీ చర్చలు జరుపుతున్నట్లు తెలిసింది. ఆయనను పార్టీలో చేర్చుకోవటం ద్వారా ఉమ్మడి ఆదిలాబాద్‌ జిల్లాలో భారాసను దెబ్బకొట్టాలని కాంగ్రెస్‌ భావిస్తోంది. విఠల్‌తో రాష్ట్ర కాంగ్రెస్‌ పార్టీకి చెందిన ఒకరిద్దరు పెద్దలు సంప్రదింపులు జరిపినట్లు సమాచారం. ఈ విషయమై ఆయనను ఫోన్లో సంప్రదించగా.. ‘‘నేనొక ఎమ్మెల్సీని. నాతో ఏ పార్టీ నేతలైనా మాట్లాడటానికి, కలవడానికి ఆస్కారం ఉంటుంది. అందులో తప్పు లేదు. పార్టీ మారే విషయంలో ఎలాంటి చర్చ జరగలేదు. ప్రస్తుతానికైతే నేను ఎలాంటి నిర్ణయం తీసుకోలేదు’’ అని పేర్కొన్నారు.