రాష్ట్రానికి జగన్‌ వద్దనడానికి సవాలక్ష కారణాలున్నాయి: కన్నా లక్ష్మీనారాయణ

గుంటూరు (పట్టాభిపురం), న్యూస్‌టుడే: ‘‘ఒక్క అవకాశం’ అంటూ అధికారంలోకి వచ్చిన జగన్‌ ఇప్పుడు కొత్తగా ‘ఏపీ నీడ్స్‌ జగన్‌’ అంటూ ప్రజల్లోకి రావడం సిగ్గుచేటు. ఈ రాష్ట్రానికి జగన్‌ వద్దు అనడానికి సవాలక్ష కారణాలు ఉన్నాయి’’ అని మాజీ మంత్రి, తెదేపా నేత కన్నా లక్ష్మీనారాయణ విమర్శించారు. గుంటూరులోని నివాసంలో ఆదివారం ‘ఏపీ హేట్్స జగన్‌’ పుస్తకాన్ని ఆవిష్కరించి, మాట్లాడారు. ‘ఏపీకి జగన్‌ ఎందుకు వద్దో కారణాలతో బుక్‌లెట్ ముద్రించాం. రాజధాని అమరావతిని నాశనం చేసి విశాఖను నిలువునా దోచుకున్నారు. ఏటా జాబ్‌ క్యాలెండర్‌ విడుదల చేస్తానని నిరుద్యోగులను మోసం చేశారు. కేంద్రం మెడలు వంచి ప్రత్యేక హోదా తీసుకొస్తానని ప్రజల్ని దగా చేశారు. రివర్స్‌ టెండరింగ్‌ పేరుతో పోలవరాన్ని నాశనం చేశారు. అందుకే మీరు మాకొద్దు అంటున్నారు ప్రజలు. రాష్ట్రంలో దోచుకోవడానికి ఇక ఏమీ లేవు. గత ఎన్నికల్లో కేసీఆర్‌ డబ్బు ఇచ్చారని ఏపీ ప్రజల పొట్ట కొట్టారు’ అని కన్నా ధ్వజమెత్తారు. సమావేశంలో తెదేపా నాయకులు తాళ్ల వెంకటేష్‌ యాదవ్‌ తదితరులు పాల్గొన్నారు.