Chandrababu: నేడు దిల్లీకి చంద్రబాబు.. రేపు ప్రధాని మోదీతో భేటీ

ఈనాడు, అమరావతి: ముఖ్యమంత్రి చంద్రబాబు బుధవారం దిల్లీ వెళ్లనున్నారు. సాయంత్రం 5.10 గంటలకు విజయవాడ విమానాశ్రయం నుంచి బయల్దేరి 7.25 గంటలకు దిల్లీ చేరుకుని రాత్రికి అక్కడే బస చేయనున్నారు. గురువారం ఉదయం ప్రధాని నరేంద్ర మోదీతో భేటీ అవుతారు. అనంతరం హోం మంత్రి అమిత్‌ షా, ఆర్థిక శాఖ మంత్రి నిర్మలా సీతారామన్, నితిన్‌ గడ్కరీ, జేపీ నడ్డా తదితరులను కలిసే అవకాశముంది. సీఎంగా బాధ్యతలు స్వీకరించిన తర్వాత చంద్రబాబు దిల్లీకి వెళ్లటం ఇదే తొలిసారి. ఆయనతో పాటు రాష్ట్ర మంత్రులు పయ్యావుల కేశవ్, నిమ్మల రామానాయుడు, బీసీ జనార్దన్‌రెడ్డి ఈ పర్యటనలో పాల్గొననున్నారు. విభజన హామీల అమలు, పోలవరం ప్రాజెక్టుకు నిధులు, రాష్ట్రానికి ప్రత్యేక ఆర్థిక సాయం, ఆహార శుద్ధి యూనిట్ల ఏర్పాటుకు సహకారం, పారిశ్రామిక రాయితీలు, మౌలిక వసతుల కల్పన ప్రాజెక్టుల మంజూరు వంటి అంశాల్లో సహకారం అందించాలని ప్రధాని, సంబంధిత శాఖల మంత్రులను చంద్రబాబు కోరే అవకాశం ఉంది. రాష్ట్ర ఆర్థిక పరిస్థితిపై కూడా నివేదికలు ఇవ్వనున్నట్లు సమాచారం. కేంద్రం త్వరలో ప్రవేశపెట్టనున్న బడ్జెట్‌లో ఏపీకి మేలు జరిగేలా కేటాయింపులు జరపాలని కోరనున్నట్లు సమాచారం.