Chiranjeevi: పోరు బాటలో విశ్వంభర

‘విశ్వంభర’ చిత్రీకరణను పరుగులు పెట్టిస్తున్నారు చిరంజీవి. ఆయన కథానాయకుడిగా నటిస్తున్న ఈ సినిమాని వశిష్ఠ తెరకెక్కిస్తున్న సంగతి తెలిసిందే. యూవీ క్రియేషన్స్‌ సంస్థ నిర్మిస్తోంది. త్రిష కథానాయిక. ఆషికా రంగనాథ్, కునాల్‌ కపూర్‌ తదితరులు ముఖ్య పాత్రలు పోషిస్తున్నారు. ఈ సినిమా ఇటీవలే హైదరాబాద్‌లో కొత్త షెడ్యూల్‌ను ప్రారంభించుకుంది. ప్రత్యేకంగా సిద్ధం చేసిన భారీ సెట్‌లో ప్రస్తుతం చిరుతో పాటు ముఖ్య తారాగణంపై కీలక సన్నివేశాలు చిత్రీకరిస్తున్నారు. ఆ సెట్‌లోనే ఈ వారం నుంచి ఓ భారీ యాక్షన్‌ సీక్వెన్స్‌ తెరకెక్కించనున్నారని సమాచారం. దీనికి రామ్‌-లక్ష్మణ్‌ మాస్టర్స్‌ నేతృత్వం వహించనున్నట్లు తెలిసింది. కాగా.. తాజాగా ఈ చిత్ర సెట్లో దర్శకుడు వి.వి.వినాయక్‌ సందడి చేశారు. దీనికి సంబంధించిన ఫొటోను చిత్ర బృందం సామాజిక మాధ్యమాల్లో పంచుకుంది. సోషియో ఫాంటసీ అంశాలతో నిండిన ఈ యాక్షన్‌ అడ్వెంచర్‌ థ్రిల్లర్‌ను వచ్చే ఏడాది జనవరి 10న ప్రేక్షకుల ముందుకు తీసుకు రానున్నారు. ఈ చిత్రానికి ఎం.ఎం.కీరవాణి సంగీతమందిస్తున్నారు.