Shah Rukh Khan: షారుక్‌ ఖాన్‌కు అరుదైన గౌరవం.. తొలి భారతీయ నటుడిగా

ఇంటర్నెట్‌ డెస్క్‌: ప్రముఖ నటుడు షారుక్‌ ఖాన్‌ (Shah Rukh Khan)కు అరుదైన గౌరవం దక్కింది. లొకర్నో ఫిల్మ్‌ఫెస్టివల్‌ (Locarno Film Festival) జ్యూరీ ఆయన్ను ‘కెరీర్‌ అఛీవ్‌మెంట్‌ అవార్డు’కు ఎంపిక చేసింది. ఈ మేరకు సోషల్‌ మీడియాలో పోస్ట్‌ పెట్టింది. ‘‘షారుక్‌లాంటి లివింగ్‌ లెజెండ్‌ను  ఆహ్వానించాలనే కల నెరవేరింది. ఆయనో సూపర్‌స్టార్‌. హీరోగా, ప్రొడ్యూసర్‌గా ఇండియన్‌ ఫిల్మ్‌ ఇండస్ట్రీలో తనదైన ముద్ర వేశారు’’ అని కొనియాడింది. ఈ పోస్ట్‌పై షారుక్‌ అభిమానులు హర్షం వ్యక్తం చేస్తున్నారు. తమ అభిమాన నటుడికి శుభాకాంక్షలు తెలియజేస్తున్నారు.

లొకర్నో ఫిల్మ్‌ఫెస్టివల్‌ 77వ ఎడిషన్‌ ఆగస్టు 7 నుంచి 17 వరకు లొకర్నో (స్విట్జర్లాండ్‌)లో జరగనుంది. 10న షారుక్‌కు అవార్డు ప్రదానం చేయనున్నారు. ఆయన కెరీర్‌లో సూపర్‌హిట్‌గా నిలిచిన చిత్రాల్లో ఒకటైన ‘దేవ్‌దాస్‌’ను ఆ ఈవెంట్‌లో ప్రదర్శించనున్నారు. ఆ పురస్కారానికి ఎంపికైన తొలి భారతీయ నటుడిగా షారుక్‌ నిలిచారు. ఇంతకుముందు ఫ్రాన్సిస్కో రోసీ, జానీ టో వంటి హాలీవుడ్‌ ప్రముఖులు ఆ పురస్కారానికి ఎంపికయ్యారు. 32 ఏళ్ల నట ప్రస్థానంలో షారుక్‌ 100కిపైగా చిత్రాల్లో నటించి, మెప్పించారు. గతేడాది ‘పఠాన్‌’, ‘జవాన్‌’, ‘డంకీ’లతో అలరించిన ఆయన ప్రస్తుతం సుజోయ్‌ ఘోష్‌ దర్శకత్వంలో ఓ సినిమాలో నటిస్తున్నారు. ఆయన కుమార్తె సుహానా ఖాన్‌ కీలక పాత్ర పోషిస్తున్న ఈ చిత్రానికి ‘కింగ్‌’ టైటిల్‌ని ఖరారు చేసినట్టు సమాచారం.