Samantha: పోటీ ఎప్పుడూ ఉంటుంది.. మరింత కష్టపడి పనిచేస్తా: సమంత

ఇంటర్నెట్ డెస్క్‌: స్టార్‌ హీరోయిన్‌ సమంత ఇటీవల ఐఎండీబీ విడుదల చేసిన ‘టాప్‌ 100 మోస్ట్‌ వ్యూడ్ ఇండియన్‌ స్టార్స్‌’ జాబితాలో 13వ స్థానాన్ని సొంతం చేసుకున్న సంగతి తెలిసిందే. దీనిపై తాజాగా ఆమె (Samantha) ఓ ఆంగ్ల మీడియాతో మాట్లాడుతూ ఇండస్ట్రీలో పోటీ ఎప్పుడూ ఉంటుందన్నారు.

‘మంచి పోటీ వల్ల ఆలోచనా శక్తి పెరుగుతుంది. ప్రతీ రంగంలో ఒకరితో మరొకరు పోల్చుకోవడం సహజం. నేను పక్కవారిని చూసి స్ఫూర్తి పొందుతుంటాను. వారి విజయాలను చూసి ఇంకా ఎక్కువ కష్టపడి పనిచేయాలని అనుకుంటాను. నేనెప్పుడూ పోటీని నెగెటివ్‌గా చూడను. ఐఎండీబీ జాబితాలో 13వ స్థానాన్ని సొంతం చేసుకోవడం ఆనందంగా ఉంది. నా కష్టానికి దక్కిన ప్రతిఫలమిది. కెరీర్‌ను ఇప్పుడే మొదలుపెట్టినట్లు అనిపిస్తుంది. అప్పుడే ఇన్నేళ్లు ఎలా గడిచాయో అర్థం కావట్లేదు. గొప్ప సినిమాల్లో అవకాశాలు వస్తున్నాయి. ఇకపై మరింత ఎక్కువ కష్టపడి పనిచేస్తా’ అని సమంత (Samantha Ruth Prabhu) చెప్పారు.

దక్షిణాది వాళ్లకు బాలీవుడ్‌లో గౌరవం దక్కుతోంది

సమంత ప్రస్తుతం ‘మా ఇంటి బంగారం’ (Maa Inti Bangaram)లో నటిస్తున్నారు. దీనికి ఆమె నిర్మాతగానూ వ్యవహరిస్తున్నారు. తన నిర్మాణ సంస్థ ‘ట్రా లా లా మూవింగ్‌ పిక్చర్స్‌’ (Tralala Moving Pictures)పై రూపొందుతున్న తొలి చిత్రమిదే కావడం విశేషం.  గతేడాది సెప్టెంబరులో ‘ఖుషి’తో అలరించిన ఆమె.. వెబ్‌సిరీస్‌ ‘సిటడెల్‌: హనీ- బన్నీ’ (Citadel: Honey Bunny)తో త్వరలోనే సందడి చేయనున్నారు. బాలీవుడ్‌ నటుడు వరుణ్‌ధావన్‌ హీరోగా రాజ్‌ అండ్‌ డీకే ఈ సిరీస్‌ని రూపొందించారు. ప్రముఖ ఓటీటీ ‘అమెజాన్‌ ప్రైమ్‌ వీడియో’లో ఇది స్ట్రీమింగ్‌ కానుంది.