Ramya krishna: నా జీవితంలో నేను తీసుకున్న మంచి నిర్ణయమదే: రమ్యకృష్ణ

హైదరాబాద్‌: వెండితెరపై కనిపించిన కొన్ని జోడీలను ఎప్పటికీ మర్చిపోలేం. అలాంటి ఒక జోడినే రజనీకాంత్‌ (Rajinikanth), రమ్యకృష్ణలది. 1999లో వచ్చిన ‘నరసింహ’ సినిమాలో వీళ్లిద్దరూ కలిసి కనిపించారు. ఇప్పుడు మళ్లీ 24 ఏళ్ల తర్వాత ‘జైలర్‌’లో (Jailer)లో కనిపించనున్నారు. నెల్సన్‌ దిలీప్‌ కుమార్‌ దర్శకత్వం వహించిన ఈ సినిమా ఆగస్టు 10న విడుదల కానుంది. ఈ మూవీ ప్రచారంలో రమ్యకృష్ణ (Ramya Krishnan) మాట్లాడుతూ ‘నరసింహ’ సంగతులను గుర్తుచేసుకున్నారు. ఆ సినిమాలో నీలాంబరి పాత్ర తన కెరీర్‌ను మలుపు తిప్పిందని చెప్పారు.

‘‘నరసింహ’లో అవకాశం వచ్చినప్పుడు మొదటి హీరోయిన్‌నా.. రెండో హీరోయిన్‌నా.. ఇలా ఏం ఆలోచించలేదు. రజనీకాంత్‌ సినిమాలో నేను భాగం కావాలనుకున్నాను. అందుకే వెంటనే ఓకే చెప్పాను. నా జీవితంలో నేను తీసుకున్న అత్యుత్తమ నిర్ణయమదే. ఆ సినిమాలో సౌందర్య ముఖం మీద నేను కాలు పెట్టే సన్నివేశం ఉంటుంది. ఆ సన్నివేశాన్ని ప్రేక్షకులు ఎలా స్వీకరిస్తారో అని భయపడ్డాను. ఇక ‘బాహుబలి’ (Baahubali) నాకు మరో హిట్‌ను అందించింది. ఆ సినిమా ఇంతపెద్ద విజయం సాధిస్తుందని ఊహించలేదు. నేను అందులో నటించడానికి కొన్ని షరతులు పెట్టాను. ‘రాత్రిపూట షూటింగ్‌ చేయను, కొద్దిరోజులు మాత్రమే సమయం ఇస్తాను..’ఇలాంటి వాటన్నిటికీ రాజమౌళి అంగీకరించారు’’ అని చెప్పారు. 

దర్శకుడిని మార్చాలంటూ సలహా.. పట్టించుకోని రజనీ: ‘జైలర్‌’ సంగతులివీ!

అలాగే చిరంజీవి (Chiranjeevi), రజనీకాంత్‌ గురించి మాట్లాడుతూ కొద్ది మంది మాత్రమే అలాంటి స్టార్‌డమ్‌ను సొంతం చేసుకోగలరని అన్నారు. ‘‘రజనీకాంత్‌, చిరంజీవి స్క్రీన్‌పై కనిపిస్తే వృద్ధుల నుంచి చిన్న పిల్లల వరకు అందరూ ఎంజాయ్‌ చేస్తారు. అలా ఉండడం కేవలం కొద్దిమందికి మాత్రమే సాధ్యమవుతుంది. ఏదైనా పార్టీ జరిగినప్పుడు కూడా కొంతమందిని ఆకట్టుకోవడమే కష్టం.. అలాంటిది వీళ్లు లక్షలాది మందిని ఆకర్షిస్తారు. ఇలా చేయడానికి ఎలాంటి లాజిక్‌ ఉండదు. భవిషత్తులో ఇలాంటి స్టార్లు వస్తారో లేదో నాకు తెలియదు.. ఒకవేళ వచ్చినా వాళ్లు ఇంత సుదీర్ఘ కాలం స్టార్‌డమ్‌ను కొనసాగిస్తారో లేదో చెప్పలేను’’ అని రమ్యకృష్ణ అన్నారు.