Kartik Aaryan: ఈ పాత్ర నా జీవితాన్నే మార్చేసింది

నాయకానాయికలు ఎన్ని సినిమాలు చేసినా.. వారి జీవితంలో కొన్ని చిత్రాలకు ప్రత్యేకమైన స్థానం ఉంటుంది. అలా తన సినీ ప్రయాణంలో ‘చందు ఛాంపియన్‌’ మరపురానిది అంటున్నాడు బాలీవుడ్‌ హీరో కార్తిక్‌ ఆర్యన్‌. ఆయన ప్రధాన పాత్రలో ఒలింపియన్‌ మురళీకాంత్‌ పేట్కర్‌ జీవితం ఆధారంగా కబీర్‌ ఖాన్‌ తెరకెక్కించిన చిత్రమిది. గత నెల ప్రేక్షకుల ముందుకు వచ్చిన ఈ సినిమా మంచి ప్రశంసలు అందుకుంది. కార్తిక్‌ నటన అందర్నీ ఆకట్టుకుంది. ఈ సందర్భంగా ఈ సినిమా పట్ల తన ఆనందాన్ని ఇన్‌స్టా వేదికగా కార్తిక్‌ తెలుపుతూ...‘మనం నటించిన కొన్ని పాత్రలు మనసును హత్తుకుంటాయి. జీవితాన్నే మార్చేస్తాయి. ఆ విధంగా ‘చందు ఛాంపియన్‌’లో నేను పోషించిన మురళీకాంత్‌ పేట్కర్‌ పాత్ర నా ప్రయాణాన్ని పూర్తిగా మార్చేసింది. ఈ పాత్ర విషయంలో నా చేయి పట్టుకొని నడిపించిన దర్శకుడు కబీర్‌ఖాన్‌ సర్‌కి కృతజ్ఞతలు’ అంటూ రాసుకొచ్చారు. ‘స్ఫూర్తిదాయక, అసమాన పోరాటతత్వం ఉన్న కథ ఇది. మానవ సంకల్ప బలానికి సంబంధించింది కాబట్టే అందరి మనసుల్ని కదిలిస్తోంది. ఎంతోమంది తమ కలల్ని సాకారం చేసుకునేందుకు స్ఫూర్తినిస్తోంది. నాలోని భావోద్వేగాలను తట్టి లేపిన చిత్రమిది’ అంటూ ముగించాడు. త్వరలో ‘భూల్‌ భులయ్యా 3’తో నవ్వించేందుకు రానున్నాడు కార్తిక్‌.