కొత్త జంటకు దెయ్యం పాట్లు

అదొక శాపగ్రస్తమైన ఊరు. ఆ ఊరిలో ప్రతి ఇంటికి రెండు గుమ్మాలుంటాయి. ఒకటి పెద్దది, ఇంకోటి చిన్నది. ప్రతి మంగళవారం దెయ్యం రాకపోకల కోసం రెండోదాన్ని తెరిచి ఉంచాల్సిందే. కానీ పొరపాటున చిన్న గుమ్మాన్ని మూసేస్తుంది కొత్తగా పెళ్లైన ఓ జంట. ఆ తర్వాతేం జరిగింది? అసలు కథేంటి తెలియాలంటే ‘కాకుద’ చిత్రం చూడాల్సిందే. బుధవారం విడుదలైన ఈ చిత్ర ట్రైలర్‌లో ఈ ఉత్కంఠ రేపే సన్నివేశాలు చూపించారు. సోనాక్షి సిన్హా, రితేశ్‌ దేశ్‌ముఖ్, షకీబ్‌ సలీమ్‌ ప్రధాన పాత్రల్లో నటించిన సినిమా ఇది. ‘ముంజ్యా’ దర్శకుడు ఆదిత్య సర్పోత్‌దార్‌నే ఈ హారర్‌ కామెడీకీ దర్శకత్వం వహించారు. ఇందులో సోనాక్షి, షకీబ్‌లు దెయ్యంతో ఇబ్బంది పడే కొత్త జంటగా కనిపించగా.. దెయ్యాన్ని వెంటాడి బంధించడానికి వచ్చే మాంత్రికుడిగా రితేశ్‌ నటించారు. ఈ సినిమా జులై 5న విడుదలవుతోంది.