షారుక్‌కి స్విట్జర్లాండ్‌ పురస్కారం

బాలీవుడ్‌ బాద్షా షారుక్‌ ఖాన్‌ ప్రతిష్ఠాత్మక 77వ లోకర్నో ఫిల్మ్‌ ఫెస్టివల్‌లో జీవితకాల సాఫల్య పురస్కారం అందుకోనున్నారు. ఆయనను ‘పార్డో అలా కెరియరే అస్కోనా-లోకర్నో టూరిజం’ అవార్డుతో ఆగస్టు 10న సత్కరించనున్నారు. ఈ చిత్రోత్సవాలు స్విట్జర్లాండ్‌లోని లోకర్నోలో జరగనున్నాయి. ఈ సందర్భంగా షారుక్‌ నటించిన ‘దేవదాస్‌’ని ఆగస్టు 7న చిత్రోత్సవాల్లో ప్రదర్శించనున్నారు. షారుక్‌ సినీరంగానికి చేసిన చేసిన విశేష సేవలకుగాను ఈ అవార్డుకు ఎంపిక చేసినట్టు నిర్వాహకులు ప్రకటించారు. ‘32 ఏళ్లలో వందకుపైగా చిత్రాల్లో నటించిన భారతీయ సూపర్‌స్టార్, గ్లోబల్‌ ఐకాన్‌ ఆయన. అన్నిరకాల జానర్స్‌లో, విశేషమైన పాత్రల్లో నటించారు. ఆ సేవలకు గుర్తింపుగా ఈ అవార్డుకు ఎంపిక చేసి గౌరవిస్తున్నాం’ అని చిత్రోత్సవాల వెబ్‌సైట్‌లో తెలిపారు. అందులో షారుక్‌ని.. కింగ్‌ ఖాన్, నటనలో లెజెండ్, జనం హీరోగా అభివర్ణించారు. ఈ పురస్కారం అందుకున్న తొలి భారతీయ నటుడు షారుక్‌.