Naga Chaitanya: నాగ చైతన్యతో సినిమా చేయకపోవడానికి కారణమదే: ‘నాంది’ దర్శకుడు

ఇంటర్నెట్‌ డెస్క్: హీరో అల్లరి నరేశ్‌తో ‘నాంది’ (Naandhi) సినిమాని తెరకెక్కించి, తొలి ప్రయత్నంలోనే దర్శకుడు విజయ్‌ కనకమేడల (Vijay Kanakamedala) మంచి గుర్తింపు పొందారు. తదుపరి చిత్రం ఏ హీరోతో చేస్తారా? అని సినీ ప్రియులు ఎదురుచూస్తుండగా మళ్లీ నరేశ్‌తోనే అంటూ సర్‌ప్రైజ్‌ ఇచ్చారు. ఈ కాంబినేషన్‌లో రూపొందిన రెండో చిత్రం ‘ఉగ్రం’ (Ugram) మే 5న విడుదల కానుంది. ఈ నేపథ్యంలో విజయ్‌ ఓ ఇంటర్వ్యూలో పాల్గొన్నారు. ‘నాంది’ తర్వాత జరిగిన పరిణామాలపై స్పందించారు. ఓ కథకు సంబంధించిన క్లైమాక్స్ విషయంలో అక్కినేని నాగచైతన్య (Naga Chaitanya) సంతృప్తి చెందకపోవడంతో ఆయనతో సినిమా తీయలేదని, భవిష్యత్తులో అది కార్యరూపం దాల్చవచ్చని ఆశాభావం వ్యక్తం చేశారు.

‘నాంది’ విజయం తర్వాత విజయ్‌.. నాగ చైతన్య సహా పలువురు కథానాయకులకు ఓ స్టోరీ వినిపించారట. ఆ కథ చైతన్యకు నచ్చిందని, అయితే 15 నిమిషాల క్లైమాక్స్‌ సీన్‌ విషయంలో ఆయన సంతృప్తిగా లేరని, కథ విషయంలో హీరో- దర్శకుడు మధ్య భిన్నాభిప్రాయాలుంటే ఔట్‌పుట్‌ సరిగా రాదనే ఉద్దేశంతోనే సినిమాని పట్టాలెక్కించలేదని విజయ్‌ తెలిపారు. ఆ తర్వాత తాను ‘ఉగ్రం’ సినిమాతో బిజీ అయ్యానని, నాగచైతన్య.. దర్శకుడు వెంకట్‌ ప్రభు చిత్రాన్ని (కస్టడీ) ఖరారు చేశారని చెప్పారు. తాము తరచూ కలుసుకుంటుంటామని, కచ్చితంగా సినిమా చేద్దామని చైతూ అంటారని విజయ్‌ పేర్కొన్నారు. ముందుగా.. తామిద్దరు అనుకున్న విధంగా కాకుండా ఆ క్లైమాక్స్‌ విషయంలో మరో కొత్త ఆలోచన ‘ఉగ్రం’ సినిమా చిత్రీకరణ సమయంలో వచ్చిందన్నారు. ఆ కథ వేరే హీరోతోనైనా తెరకెక్కవచ్చని, కుదిరితే నాగ చైతన్యతోనే చేయొచ్చని అభిప్రాయపడ్డారు. ‘నాంది’లో.. చేయని నేరానికి జైలు పాలైన సాఫ్ట్‌వేర్‌ ఇంజినీర్‌గా కనిపించిన అల్లరి నరేశ్‌ ‘ఉగ్రం’లో పవర్‌ఫుల్‌ పోలీసు అధికారిగా కనిపించనున్నారు.