Custody: కస్టడీ కహానీ

నాగచైతన్య (Naga Chaitanya) కథానాయకుడిగా... శ్రీనివాసా సిల్వర్‌స్క్రీన్‌ పతాకంపై రూపొందుతున్న ద్విభాషా చిత్రం ‘కస్టడీ’ (Custody). కృతిశెట్టి కథానాయిక. వెంకట్‌ ప్రభు దర్శకత్వం వహిస్తున్నారు. శ్రీనివాసా చిట్టూరి నిర్మాత. అరవింద్‌ స్వామి, ప్రియమణి కీలక పాత్రలు పోషిస్తున్న ఈ సినిమా మే 12న ప్రేక్షకుల ముందుకు రానుంది. కొత్త ఏడాదికి స్వాగతం పలుకుతూ చిత్రబృందం ఆదివారం ఓ ప్రత్యేకమైన వీడియోని విడుదల చేసింది. అందులో నాగచైతన్య గాఢతతో కూడిన మాస్‌ లుక్‌లో కనిపిస్తున్నారు. యాక్షన్‌ అంశాలకి పెద్దపీట వేస్తూ రూపొందిస్తున్న చిత్రం అని స్పష్టమవుతోంది. పోలీస్‌ కస్టడీ నేపథ్యంలో సాగే ఈ కథలో నాగచైతన్య... శివ అనే యువకుడిగా కనిపిస్తారు. పోలీస్‌ పాత్రలోనే ఆయన సందడి చేయనున్నారు. ప్రస్తుతం చిత్రీకరణ దశలో ఉన్న ఈ సినిమాలో సంపత్‌రాజ్‌, శరత్‌కుమార్‌, ప్రేమ్‌జీ, వెన్నెల కిషోర్‌, ప్రేమి విశ్వనాథ్‌ తదితరులు కీలక పాత్రల్లో నటిస్తున్నారు. ఛాయాగ్రహణం: ఎస్‌.ఆర్‌.కదిర్‌, కూర్పు: వెంకట్‌ రాజన్‌, సంభాషణలు: అబ్బూరి రవి, ప్రొడక్షన్‌ డిజైన్‌: రాజీవ్‌, సంగీతం: ఇళయరాజా, యువన్‌ శంకర్‌ రాజా.