Ante Sundaraniki: ‘అంటే... సుందరానికీ’ ట్రైలర్‌ వచ్చేసింది.. నవ్వులు తెచ్చేసింది!

ఇంటర్నెట్‌ డెస్క్‌: చాలాకాలం తర్వాత నాని నటించిన కామెడీ ప్రధాన చిత్రం ‘అంటే... సుందరానికీ!’ (Ante Sundaraniki). వివేక్‌ ఆత్రేయ దర్శకత్వం వహించిన ఈ ఎంటర్‌టైనర్‌ జూన్‌ 10న ప్రేక్షకుల ముందుకు రానుంది. ఈ సందర్భంగా చిత్ర బృందం ట్రైలర్‌ను విశాఖపట్నం వేదికగా గురువారం విడుదల చేసింది. ఈ సినిమాలో ఎంత వినోదం ఉంటుందో ఇప్పటికే విడుదలైన పాటలు, టీజర్‌ చెప్పకనే చెప్పాయి. ఇప్పుడీ ట్రైలర్‌ అంతకుమించిన వినోదం పంచేలా ఉంది. ఈ ప్రచార చిత్రంలో చూపించిన ప్రతి క్యారెక్టర్‌ నవ్వుల జల్లు కురిపిస్తోంది. ముఖ్యంగా కథానాయకుడి హావభావాలు చక్కిలిగింతలు పెట్టేలా ఉన్నాయి. మైత్రీ మూవీ మేకర్స్‌ సంస్థ నిర్మించిన ఈ చిత్రంలో సుందర్‌గా నాని కనిపించనున్నారు. మలయాళ నటి నజ్రియా లీల అనే పాత్ర పోషించింది. నరేశ్‌, రోహిణి, హర్షవర్ధన్‌, రాహుల్‌ రామకృష్ణ, సుహాస్‌ తదితరులు కీలక పాత్రలు పోషించిన ఈ చిత్రానికి సంగీతం: వివేక్‌ సాగర్‌, ఛాయాగ్రహణం: నికేత్‌ బొమ్మి, కూర్పు: రవితేజ గిరిజాల.