Anjali: బాలకృష్ణతో నాకు మంచి అనుబంధం ఉంది: నటి అంజలి

ఇంటర్నెట్‌ డెస్క్‌: నటి అంజలితో బాలకృష్ణ దురుసుగా ప్రవర్తించారంటూ కొన్ని వీడియోలు సోషల్ మీడియాలో వైరలవుతోన్న సంగతి తెలిసిందే. ఇటీవల జరిగిన ‘గ్యాంగ్స్ ఆఫ్ గోదావరి’ (Gangs of Godavari) ప్రీ రిలీజ్‌ ఈవెంట్‌కు బాలకృష్ణ అతిథిగా హాజరై సందడి చేశారు. ఈ వేడుకలో అంజలిని (Anjali) ఆయన నెట్టేశారంటూ కొందరు ప్రచారం చేస్తున్నారు. తాజాగా బాలయ్యతో తనకున్న అనుబంధం గురించి అంజలి పోస్ట్‌ పెట్టారు. దీంతో ఈ వ్యవహారానికి ఫుల్‌స్టాప్‌ పడింది.

‘బాలకృష్ణ (Balakrishna) హాజరుకావడం వల్ల ‘గ్యాంగ్స్‌ ఆఫ్ గోదావరి’ ప్రీ రిలీజ్‌ ఈవెంట్‌ మరింత ఘనంగా జరిగింది. ఆయనంటే నాకు ఎంతో గౌరవం. నాతో ఆప్యాయంగా ఉంటారు. మేమిద్దరం ఎన్నో ఏళ్లుగా స్నేహంగా ఉంటున్నాం. ఈ సినిమా వేడుక సందర్భంగా బాలకృష్ణతో కలిసి మరోసారి వేదిక పంచుకోవడం ఆనందంగా ఉంది’ అని రాసుకొచ్చారు. ఈ ఈవెంట్‌లో వీళ్లిద్దరి మధ్య జరిగిన కొన్ని మూమెంట్స్‌కు సంబంధించిన వీడియోను పంచుకున్నారు.

బాలయ్యబాబు కూర్చొన్న దగ్గర ఏ బాటిల్‌ లేదు.. అదంతా సీజీ: నాగవంశీ

మరోవైపు ఈ విషయంపై నిర్మాత నాగవంశీ స్పందించారు. ఫొటోకు పోజు ఇచ్చేందుకు వెనక్కి జరగాలని బాలయ్య చనువుకొద్దీ అలా చేశారని అన్నారు. నలుగురు వ్యక్తులు ఉన్నప్పుడు తమకున్న పరిచయం, చనువును బట్టి అలా ఎవరైనా చేస్తారని చెప్పారు. ఆ చర్యకు ముందూ.. వెనక ఉన్న పూర్తి వీడియోను చూడకుండా ఇలాంటి వాటిని ప్రచారం చేయడం తగదన్నారు. ఆ తర్వాత బాలకృష్ణ, అంజలి హైఫై అంటూ చేతులతో చప్పట్లు కొడుతున్న దృశ్యాన్ని ఎవరూ చూపించలేదని చెప్పారు.