Zika Alert: ‘జికా’ వైరస్‌ కలకలం.. రాష్ట్రాలకు కేంద్రం అడ్వైజరీ

దిల్లీ: మహారాష్ట్రలో పలుచోట్ల జికా వైరస్‌ కేసులు వెలుగు చూడటం కలవరపెడుతోంది. ఇప్పటికే ఏడు కేసులు నిర్ధరణ అయినట్లు అధికారులు పేర్కొన్నారు. ఈ నేపథ్యంలో వైరస్‌ వ్యాప్తిపై నిఘా పెట్టాల్సిన అవసరాన్ని గుర్తుచేస్తూ అన్ని రాష్ట్రాలకు కేంద్ర ఆరోగ్యశాఖ అడ్వైజరీ జారీ చేసింది. ముఖ్యంగా గర్భిణీలకు స్క్రీనింగ్‌ పరీక్షలు నిర్వహించడం, ఒకవేళ పాజిటివ్‌ వచ్చినట్లయితే పిండం ఎదుగుదలను ఎప్పటికప్పుడు పర్యవేక్షించాలని రాష్ట్ర ప్రభుత్వాలకు విజ్ఞప్తి చేసింది.

• డెంగీ, చికెన్‌ గున్యా మాదిరిగానే దోమల ద్వారా జికా వైరస్‌ సంక్రమిస్తుంది. ఎడిస్‌ దోమలు కుట్టడం ద్వారా ఇది సోకుతుంది.
• ఇది ప్రాణాంతకం కాకపోయినప్పటికీ.. ఇన్‌ఫెక్షన్‌ సోకిన మహిళకు పుట్టబోయే పిల్లలు తల చిన్నగా ఉండడం (Microcephaly)తోపాటు నాడీ సంబంధిత సమస్యలు తలెత్తే ప్రమాదం ఉంది.
• అయితే, 2016 నుంచి ఇటువంటి కేసు ఒక్కటి కూడా దేశంలో వెలుగు చూడలేదని కేంద్ర ఆరోగ్యశాఖ పేర్కొంది.
• జ్వరం, చర్మంపై దద్దుర్లు, కండరాలు, కీళ్ల నొప్పులు, తలనొప్పి, జీర్ణకోశ సంబంధ సమస్యలు, గొంతు నొప్పి, దగ్గు వంటి లక్షణాలు కనిపిస్తాయి.
• జికా కేసులు వెలుగు చూసిన ప్రాంతాల్లో ఉండే గర్భిణీలపై ప్రత్యేక దృష్టి పెట్టాలని కేంద్ర ఆరోగ్యశాఖ అన్ని రాష్ట్రాలకు విజ్ఞప్తి చేసింది.
• నివాస ప్రాంతాలు, పని ప్రదేశాలు, పాఠశాలలు, నిర్మాణ స్థలాలు, వైద్య ఆరోగ్య కేంద్రాల్లో వ్యాధి నియంత్రణ చర్యలు చేపట్టాలని అడ్వైజరీలో సూచించింది.
• జైకా వైరస్‌పై ప్రజలు ఆందోళనకు గురికాకుండా వైరస్‌ వ్యాప్తి, లక్షణాలు, జాగ్రత్తలపై సోషల్‌ మీడియాతోపాటు ఇతర మార్గాల్లో అవగాహన కల్పించాలని కోరింది.
• ఎడిస్‌ దోమల బెడద ఉన్న ప్రాంతాలను గుర్తించి, నోడల్‌ ఆఫీసర్‌ సాయంతో అక్కడ పర్యవేక్షణ, నివారణ చర్యలు తీసుకోవాలని డైరెక్టర్‌ జనరల్‌ ఆఫ్‌ హెల్త్‌ సర్వీసెస్‌ డాక్టర్‌ అతుల్‌ గోయల్‌ సూచించారు.
• ఈ వైరస్‌ కేసులు వెలుగుచూస్తే తీసుకోవాల్సిన జాగ్రత్తలు, సమర్థంగా ఎదుర్కొనేందుకు అన్ని స్థాయిల్లో అవసరమైన చర్యలతో రాష్ట్రాలు సిద్ధంగా ఉండాలని తెలిపింది.
• ఒకవేళ ఏదైనా కేసు గుర్తించిన వెంటనే సమగ్ర వ్యాధి పర్యవేక్షణ కార్యక్రమం (ఐడీఎస్‌పీ)తోపాటు ఎన్‌సీవీబీడీసీకి తెలియజేయాలని సూచించింది. పుణెలోని ఎన్‌ఐవీ, దిల్లీలోని ఎన్‌సీడీసీ కేంద్రాల్లో జికా నిర్ధరణ సదుపాయాలు ఉన్నాయని పేర్కొంది.
• ఈ వైరస్‌ను తొలిసారి 1947లో ఉగాండా అడవుల్లోని ఓ కోతిలో గుర్తించారు. ఆ తర్వాత ఆఫ్రికన్‌ దేశాలతోసహా భారత్, ఇండోనేషియా, మలేషియా, ఫిలిప్పైన్స్, థాయ్‌లాండ్, వియత్నాం లాంటి ఆసియా దేశాల్లోనూ ఈ వ్యాధి ప్రబలింది. మొత్తంగా 2016 నాటికి 39 దేశాల్లో వ్యాధి ఉన్నట్లు ప్రపంచ ఆరోగ్య సంస్థ (WHO) గుర్తించింది.