Tamil Nadu: కల్తీసారా విక్రయాలపై తమిళనాడు ఉక్కుపాదం

చెన్నై: ఇటీవల తమిళనాడులో కల్తీసారా బారిన పడి 60 మంది మృత్యువాత పడిన నేపథ్యంలో అక్కడి ప్రభుత్వం కఠిన చర్యలకు ఉపక్రమించింది. ఇలాంటి తరహా నేరాలకు పాల్పడిన వారిపై ఉక్కుపాదం మోపేలా చట్టంలో సవరణలు తీసుకొచ్చింది. కల్తీ మద్యం తాగి ఎవరైనా చనిపోతే.. తీవ్రతను బట్టి కారకులకు యావజ్జీవ కారాగార శిక్ష విధించనున్నారు. ఈమేరకు తమిళనాడు ప్రొహిబిషన్ యాక్ట్ -1937కు సవరణలు చేశారు. వీటి ప్రకారం మద్యం తయారీ దారులు, కల్తీ సారా విక్రయిస్తున్నవారిపైనా చర్యలు తీసుకునేందుకు వీలుంటుంది. తక్షణమే ఈ సవరణలు అమల్లోకి తీసుకొస్తున్నట్లు ప్రభుత్వం ఉత్తర్వులు జారీ చేసింది. కల్తీసారా విక్రయాలను పూర్తిగా నిర్మూలించేందుకే ఈ మార్పులు చేసినట్లు ప్రభుత్వం స్పష్టం చేసింది.