Students Protest: ఎన్‌టీఏ ఆఫీసులోకి దూసుకెళ్లిన ఆందోళనకారులు.. దిల్లీలో ఉద్రిక్తత

దిల్లీ: యూజీసీ నెట్‌ (UGC NET), నీట్‌ పీజీ (NEET UG) వంటి పరీక్షల్లో ప్రశ్నపత్రం లీకేజీ, ఇతర అక్రమాలు చోటుచేసుకోవడంతో దేశవ్యాప్తంగా తీవ్ర దుమారం రేపిన సంగతి తెలిసిందే. ఈ ప్రవేశ పరీక్షలు నిర్వహించిన జాతీయ టెస్టింగ్‌ ఏజెన్సీ (NTA)పై పెద్ద ఎత్తున ఆరోపణలు వస్తున్నాయి. ఈ అక్రమాలకు (NEET Row) వ్యతిరేకంగా పలు విద్యార్థి సంఘాల నాయకులు దేశ రాజధాని దిల్లీలో ఆందోళన సాగిస్తున్నారు. ఈ క్రమంలోనే వారిలో కొందరు గురువారం ఎన్‌టీఏ ఆఫీసులోకి దూసుకెళ్లడం గమనార్హం.

నేషనల్‌ స్టూడెంట్స్‌ యూనియన్‌ ఆఫ్‌ ఇండియా- ఎన్‌ఎస్‌యూఐ సంఘానికి చెందిన దాదాపు 100 మంది ఆందోళనకారులు (Students Protest) ఈ సాయంత్రం ఎన్‌టీఏ ఆఫీసు భవనంలోకి దూసుకెళ్లారు. అనంతరం వారు లోపలి నుంచి లాక్‌ చేసుకున్నట్లు సమాచారం. దీంతో ఎన్‌టీఏ ఆఫీసు వద్ద ఉద్రిక్త వాతావరణం నెలకొంది. ఆందోళనకారులు కార్యాలయం లోపలికి పరిగెడుతున్న దృశ్యాలు సామాజిక మాధ్యమాల్లో వైరల్‌గా మారాయి.